٤١٦٩٥۔۔۔ (ازمسندجابربن عبداللہ) سفیان ثوری، ابن المنکدر سے وہ حضرت جابر (رض) سے روایت کرتے ہیں کہ نبی (صلی اللہ علیہ وآلہ وسلم) نے دودھ نوش فرمایا اور کلی کی اور فرمایا اس کی چکنا ہٹ ہوتی ہے۔ رواہ ابن عساکر

٤١٦٩٦۔۔۔ (ازمسندجعفر بن ابی الحکم) عبدالحکم بن صہیب سے روایت ہے کہ جعفر بن ابی الحکم نے مجھے دیکھا اور میں ادھرادھر سے کھارہا تھا تو فرمایا : ارے ! بھتیجے اس طرح شیطان کھاتا ہے نبی (صلی اللہ علیہ وآلہ وسلم) جب کھانا کھاتے تھے تو اپنے ہاتھ کو اپنے سامنے پھیرتے نہ تھے۔ ابونعیم

٤١٦٩٧۔۔۔ (مسندعلی) ابن اعبد سے روایت ہے فرماتے ہیں حضرت علی (رض) نے فرمایا : ابن اعبد ! پتہ ہے کہ کھانے کا کیا حق ہے ؟ میں نے عرض کی کیا حق ہے ؟ فرمایا : تم بسم اللہ کہو اور کہواے اللہ ! جو کچھ نے تو نے ہمیں دیا اس میں برکت دے پھر فرمایا : جب کھانے سے فارغ ہوجاؤ تو اس کا شکر کیا ہے ؟ میں نے کہا : اس کا شکر کیا ہے ؟ فرمایا : تم کہو : الحمد للہ الذی اطعمنا وسقانا، ابن ابی شیبۃ، ابن ابی الدنیا فی الذعاء حلیۃ الاولیاء ابن حبان

کھانا اپنے سامنے سے کھائے

٤١٦٩٨۔۔۔ عمروبن ابی سلمۃ سے روایت ہے فرمایا : ایک دن میں نے نبی (صلی اللہ علیہ وآلہ وسلم) کے ساتھ کھانا کھایا تو میں برتن کے کناروں سے گوشت اٹھانے لگا آپ نے فرمایا : اپنے سامنے سے کھاؤ۔ رواہ ابن النجار

٤١٦٩٩۔۔۔ (مسندعمروبن مرہ الجہی) نبی (صلی اللہ علیہ وآلہ وسلم) جب کھانے سے فارغ ہوتے تو فرماتے : تمام تعریفین اللہ کے لیے جس نے ہم پر احسان کرکے ہمیں ہدایت دی تمام تعریفیں اللہ کے لیے جس نے ہمیں سیر اور سیراب کیا اور ہمیں ہر اچھی آزمائش میں آزمایا۔ رواہ ابن شیبۃ

٤١٧٠٠۔۔۔ حضرت حذیفۃ (رض) سے روایت ہے فرمایا : کہ ہم رسول اللہ (صلی اللہ علیہ وآلہ وسلم) کے پاس تھے اچانک ایک برتن لایا گیا اور رکھ دیا گیا تو نبی (صلی اللہ علیہ وآلہ وسلم) نے اس سے اپنا ہاتھ کھینچ لیاتو ہم نے بھی اپنے ہاتھ پیچھے کرلئے اور ہماری عادت تھی جب تک نبی (صلی اللہ علیہ وآلہ وسلم) کھاناشروع نہ کرتے ہم شروع نہ کرتے تھے اتنے میں ایک اعرابی آیا گویا اسے دھکیلاجارہا ہے اسے اشارہ کیا گیا کہ وہ اس سے کھائے تو نبی (صلی اللہ علیہ وآلہ وسلم) نے اس کا ہاتھ پکڑلیا، اتنے میں ایک بچی آئی گویا اسے دھکیلاجارہا ہے وہ گئی تاکہ کھاناشروع کرے تو آپ نے اس کا ہاتھ بھی روک لیا پھر فرمایا : شیطان ان لوگوں کا کھاناحلال سمجھ لیتا ہے جو کھانے پر اللہ کا نام نہیں لیتے، جب اس نے دیکھا کہ ہم کھانے سے ہاتھ روکے ہوئے ہیں تو وہ ہمارے پاس اس کھانے کو اس طرح حلال کرلے اس ذات کی قسم جس کے سوا دعاوعبادت کے لائق کوئی معبود نہیں اس کا ہاتھ ان کے ہاتھوں کے ساتھ میرے ہاتھ میں ہے۔ بزار

٤١٧٠١۔۔۔ (مسندالحکم بن رافع بن بنان) جعفر بن عبداللہ بن الحکم بن رافع سے روایت ہے فرمایا : مجھے حکم نے دیکھا میں اس وقت لڑکا تھا برتن میں سے ادھرادھر سے کھانے لگا : تو انھوں نے مجھے کہا (رح) : لڑکے اس طرح نہ کھا اس طریقہ سے شیطان کھاتا ہے، نبی (صلی اللہ علیہ وآلہ وسلم) جب کھاناتناول فرماتے تو آپ کی انگلیاں آپ کے سامنے گردش نہیں کرتی تھیں۔ ابونعیم

٤١٧٠٢۔۔۔ (ازمسندحمزہ بن عمروالاسلمی) میں نے رسول اللہ (صلی اللہ علیہ وآلہ وسلم) کے ساتھ کھانا کھایا آپ نے فرمایا : دائیں ہاتھ سے اور اپنے سامنے سے بسم اللہ پڑھ کر کھاؤ۔ طبرانی فی الکبیر وابو نعیم من طریق منجاب بن الحارث بن شریک بن ہشام بن عروۃ عن ابیہ عن حمزۃ بن عمرو الاسلمی قال : منجاب : ھذاخطاء اخطاء فیہ شریک بن ہشام، انا بہ علی بن مسھر عن ہشام بن عروۃ عن عمرو بن ابی سلمۃ

٤١٧٠٣۔۔۔ واثلۃ (رض) سے روایت ہے فرمایا جب رسول اللہ (صلی اللہ علیہ وآلہ وسلم) نے خیبر فتح کیا تو میں نے ان کے لیے کھانا تیار کیا تو آپ نے ٹیک لگا کر گردن جھکا کر کھانا کھایا اور آپ کو دھوپ لگی تو آپ نے اپنے اوپر سائبان کرلیا۔ رواہ ابن عساکر

٤١٧٠٤۔۔۔ عبداللہ بن بسر سے روایت ہے نبی (صلی اللہ علیہ وآلہ وسلم) حضرت ابی کے پاس آئے اور ان کے پاس ٹھہرے وہ آپ کے پاس ستوکا کھانا اور حلوہ لائے آپ نے کھایا پھر وہ آپ کے پاس پانی لائے تو آپ نے پانی پیا پھر باقی ماندہ اس شخص نے لیاجو آپ کی دائیں جانب تھا اور آپ جب کھجوریں کھاتے تو گٹھلیاں اس طرح رکھتے۔ حضرت عبداللہ نے اپنی انگلی سے اس کی پشت کی طرف اشارہ کیا۔ جب آپ (صلی اللہ علیہ وآلہ وسلم) سواری پر سوار ہوئے تو حضرت ابی نے آپ کے خچر کی لگام پکڑ کر عرض کی یارسول اللہ ! اللہ تعالیٰ کے حضور ہمارے لیے دعافرمائیے ! آپ نے فرمایا : اے اللہ جو کچھ تو نے انھیں عطا کیا ہے اس میں برکت دے ان کی بخشش فرما اور ان پر رحم فرما۔ ابن ابی شیبۃ و ابونعیم

٤١٧٠٥۔۔۔ عبداللہ بن بسر سے روایت ہے فرمایا : حضرت ابی نے میری والدہ سے کہا : اگر آپ رسول اللہ (صلی اللہ علیہ وآلہ وسلم) کے لیے کھانا بنادیتیں تو انھوں نے ثرید بنائی ابی رسول اللہ (صلی اللہ علیہ وآلہ وسلم) کو بلانے گئے جب نبی (صلی اللہ علیہ وآلہ وسلم) تشریف لے آئے تو آپ نے اس کے بلند حصہ پر اپنا ہاتھ رکھا اور فرمایا : بسم اللہ شروع کرو تو وہ لوگ اس کے کناروں سے کھانے لگے جب کھاچکے تو نبی (صلی اللہ علیہ وآلہ وسلم) نے فرمایا : اے اللہ ان کی بخشش فرماان پر رحم فرماان کے رزق میں برکت دے ۔ رواہ ابن عساکر

٤١٧٠٦۔۔۔ عبداللہ بن بسر سے روایت ہے فرمایا : میں نبی (صلی اللہ علیہ وآلہ وسلم) اور دیگر لوگوں کے ساتھ بیٹھ کر کھانے لگا نبی (صلی اللہ علیہ وآلہ وسلم) نے فرمایا : بچے ! اللہ کا نام لے، دائیں ہاتھ سے اور اپنے سامنے سے کھاؤ۔ رواہ ابن عساکر

٤١٧٠٧۔۔۔ عبداللہ بن بسر سے روایت ہے کہ نبی (صلی اللہ علیہ وآلہ وسلم) کے لیے کسی نے بکری کا گوشت بدیہ کیا اس وقت کھاناکم ہوتا تھا آپ نے اپنے گھروالوں سے فرمایا : اس بکری کو پکاؤ اور اس آٹے کو دیکھو روٹیاں اس سے پکانا اور اس گوشت کی ثرید بنالینا۔ فرماتے ہیں نبی (صلی اللہ علیہ وآلہ وسلم) کا ایک بڑا پیالہ تھا جسے، غرائ، کہا جاتا تھا جسے چار آدمی اٹھاتے تھے جب صبح ہوئی اور آپ نے چاشت کی نماز پڑھ لی تو اس برتن کو لایا گیا لوگ اس کے آس پاس جمع ہوگئے جب لوگوں کی تعداد بڑھ گئی رسول اللہ (صلی اللہ علیہ وآلہ وسلم) گھٹنے بچھاکربیٹھ گئے تو ایک دیہاتی شخص بولا : یہ کیسی نشست ہے ! تو نبی (صلی اللہ علیہ وآلہ وسلم) نے فرمایا : اللہ تعالیٰ نے مجھے شریف انسان بنایا ہے متکبر اور دشمنی کرنے والا نہیں بنایا، پھر فرمایا : اس کے کناروں سے کھاؤ اس کی اونچائی چھوڑدو اس میں اللہ تعالیٰ برکت دے گا اس کے بعد فرمایا : کھاؤ شروع کرو اللہ اس ذات کی قسم جس کے قبضہ قدرت میں محمد (صلی اللہ علیہ وآلہ وسلم) کی جان ہے ! تمہارے لیے روم وفارس کی زمین ضرور فتح ہوگی اور کھانا بکثرت ہوجائے گا لیکن افسوس اس پر اللہ تعالیٰ کا نام غفلت سے نہ لیا جائے گا۔ ابوبکر فی الغیلانیات ابن عساکر

٤١٧٠٨۔۔۔ حضرت عائشہ (رض) سے روایت ہے فرمایا : نبی (صلی اللہ علیہ وآلہ وسلم) چھ آدمیوں کے ساتھ کھانا تناول فرما رہے تھے اتنے میں ایک اعرابی آیا اور اس نے ان کے سامنے سے دولقمے کھائے رسول اللہ (صلی اللہ علیہ وآلہ وسلم) نے فرمایا : اگر یہ شخص اللہ تعالیٰ کا نام لے لیتا تو یہ کافی ہوجاتا جب تم میں سے کوئی کھانا کھائے تو اللہ تعالیٰ کا نام لے اگر بھول جائے جب یاد آئے تو کہے بسم اللہ اولہ واخرہ۔ رواہ ابن النجار

٤١٧٠٩۔۔۔ مسندابی السائب خباب، عبداللہ بن السائب بن خباب اپنے والد سے وہ اپنے دادا سے روایت کرتے ہیں فرمایا : میں نے رسول اللہ (صلی اللہ علیہ وآلہ وسلم) کو چارپائی پر ٹیک لگاکر ثرید کھاتے دیکھا پھر مٹی کے برتن سے پانی پیتے تھے۔ ابونعیم وقال وھو وھم الصواب ابن عبداللہ بن السائب عن ابیہ عن جدہ

٤١٧١٠۔۔۔ ابن عمر (رض) سے روایت ہے فرمایا : ہم نبی (صلی اللہ علیہ وآلہ وسلم) کے زمانہ میں کبھی کبھار چلتے کھالیتے اور کھڑے ہو کرپی لیتے تھے۔ رواہ ابن جریر

کھانے کے بعد کیا کہا جائے

٤١٧١١۔۔۔ حارث بن حارث غامدی (رض) سے روایت ہے فرمایا : میں نے رسول اللہ کو کھانے سے فراغت کے بعد فرماتے سنا : اے اللہ ! تیرے لیے سب تعریفیں ہیں تو نے ہمیں کھلایاپلایا، سیر اور سیراب کیا تیرے لیے ہی تعریف ہے جس میں نہ ناشکری ہے نہ رخصت اور نہ ہمارے رب تجھ سے بےاحتیاطی ہے۔ طبرانی فی الکبیر و ابونعیم

٤١٧١٢۔۔۔ حمیدبن ہلال سے روایت ہے فرمایا : حضرت عمربن الخطاب (رض) نے گوشت اور گھی کو اکٹھے کھانے سے منع فرمایا ہے۔ ابن السنی فی کتاب الاخوۃ

٤١٧١٣۔۔۔ حضرت عمر (رض) سے روایت ہے فرمایا : پیٹ بھرکرکھانے پینے سے پرہیز کرنا کیونکہ اس سے جسم خراب ہوجاتا ہے بیماریاں جنم لیتی ہیں نماز میں سستی پیدا ہوتی ہے ان دونوں میں میانہ روی اختیار کرو کیونکہ اس سے جسم درست رہتا فضول خرچی سے دور رکھتی ہے اللہ تعالیٰ کو لحیم شحیم آدی سے نفرت ہے آدمی اسی وقت ہلاکت میں پڑتا ہے جب اپنی خواہش کو اپنے دین پر غالب کردیتا ہے۔ ابونعیم

٤١٧١٤۔۔۔ حضرت عائشہ (رض) سے روایت ہے فرمایا : میں نے رسول اللہ (صلی اللہ علیہ وآلہ وسلم) کو دیکھا اور میں نے ایک دن میں دو مرتبہ کھانا کھایا آپ نے فرمایا : اے عائشہ ! کیا تمہیں یہ پسند ہے کہ تمہارا مشغلہ صرف تمہارا پیٹ ہو، دن میں دو مرتبہ کھانا اسراف ہے اور اللہ تعالیٰ اسراف کرنے والوں کو پسند نہیں کرتا۔ رواہ الدیلمی