(٣٣٥٤٩) حضرت ابوبکر (رض) فرماتے ہیں کہ حضرت عمر بن خطاب (رض) نے حضرت اسامہ بن زید (رض) کے لیے ساڑھے تین ہزار مقرر فرمائے۔ اور حضرت عبداللہ بن عمر (رض) کے لیے تین ہزارمقرر فرمائے۔ اس پر حضرت عبداللہ نے حضرت عمر (رض) سے فرمایا : آپ (رض) نے اسامہ بن زید کے لیے ساڑھے تین ہزار مقرر فرما دیے حالانکہ وہ اسلام میں مجھ سے مقدم نہیں اور نہ وہ حاضر ہوئے ان غزوات میں جن میں میں حاضر ہوا ؟ ! حضرت عمر (رض) نے فرمایا : اس لیے کہ زید بن حارثہ (رض) رسول اللہ (صلی اللہ علیہ وآلہ وسلم) کو تمہارے باپ سے زیادہ محبوب تھے۔ اور اسامہ بن زید رسول اللہ (صلی اللہ علیہ وآلہ وسلم) کو تمہارے سے زیادہ محبوب تھے۔ اس وجہ سے میں نے ان کے لیے تمہارے سے پانچ سو زیادہ مقرر کیے۔

(٣٣٥٥٠) حضرت ابو الزناد (رض) فرماتے ہیں کہ کہ حضرت عمر (رض) نے ہمیں ایک ایک درہم عطا کیا۔ پھر آپ (رض) نے ہمیں دو دو درہم عطا کیے۔ یعنی آپ (رض) نے ان کے درمیان تقسیم فرمائے۔

(٣٣٥٥١) حضرت انس بن مالک (رض) اور حضرت سعید بن المسیب (رض) دونوں فرماتے ہیں کہ حضرت عمر بن خطاب (رض) نے مہاجرین کے لیے پانچ ہزار مقرر فرمائے اور انصار کے لیے چار ہزار مقرر فرمائے ۔ اور مہاجرین کی اولاد میں سے جو غزوہ بدر میں شریک ہوئے تھے ان کے لیے چار ہزار مقرر فرمائے۔ ان میں اسامہ بن زید، محمد بن عبداللہ بن جحش ، عمر بن ابی سلمہ اور عبداللہ بن عمر شامل تھے۔ حضرت عبد الرحمن بن عوف (رض) نے فرمایا : یقیناً عبداللہ بن عمر (رض) ان کی طرح نہیں ہیں۔ بیشک عبداللہ تو ان کے امیر ہیں۔ اس پر حضرت عبداللہ بن عمر (رض) نے حضرت عمر (رض) سے فرمایا : اگر یہ میرا حق ہے تو آپ (رض) مجھے ضرور دیں ورنہ آپ (رض) مجھے ہرگز مت دیں۔ تو حضرت عمر (رض) نے حضرت عبد الرحمن بن عوف (رض) سے فرمایا : تم میرے چار ہزار مقرر کردو۔ اور عبداللہ کے پانچ ہزار مقرر کردو۔ اللہ کی قسم میں اور تو پانچ ہزار پر جمع نہیں ہوسکتے۔ حضرت عبداللہ بن عمر (رض) نے فرمایا : اگر میرا حق ہے تو مجھے دے دیجئے ورنہ آپ (رض) مجھے ہرگز مت دیجئے۔

(٣٣٥٥٢) حضرت جابر (رض) فرماتے ہیں کہ جب حضرت عمر (رض) کو خلافت ملی تو آپ (رض) نے حصے مقرر فرمائے۔ اور دیوان مدوّن کروائے۔ اور نگران مقرر کیے ۔ حضرت جابر (رض) فرماتے ہیں۔ آپ (رض) نے مجھے میرے ساتھیوں پر نگران بنایا۔

(٣٣٥٥٣) حضرت مخلد الغفاری (رض) فرماتے ہیں کہ تین غلام غزوہ بدر میں شریک ہوئے پس حضرت عمر (رض) ان میں سے ہر ایک کو ہر سال تین تین ہزار عطا کرتے تھے۔

(٣٣٥٥٤) حضرت عنترہ (رض) فرماتے ہیں کہ میں حضرت عثمان (رض) اور حضرت علی (رض) کے پاس حاضر ہوا اس حال میں کہ یہ دونوں حضرات لوگوں کے غلاموں کو ماہانہ تنخواہ دے رہے تھے۔

(٣٣٥٥٥) حضرت وھیب (رض) فرماتے ہیں کہ حضرت زید بن ثابت (رض) ، حضرت عثمان (رض) کے زمانہ خلافت میں بیت المال کے نگران مقرر تھے۔ ایک دن حضرت عثمان (رض) آئے ، انھوں نے دیکھا کہ وھیب ان کی مدد کر رہے ہیں۔ آپ (رض) نے پوچھا : یہ کون ہے ؟ حضرت زید (رض) نے فرمایا : میرا غلام ہے۔ آپ (رض) نے فرمایا : میرا خیال ہے کہ یہ ان لوگوں کی مدد کررہا تھا تم اس کے لیے دو ہزار مقرر کردو۔ تو آپ (رض) نے ان کے لیے ایک ہزار مقرر کردیا۔

(٣٣٥٥٦) حضرت عیاض اشعری (رض) فرماتے ہیں کہ حضرت عمر (رض) غلاموں ، باندیوں اور گھوڑوں کی ماہانہ تنخواہ دیا کرتے تھے۔

(٣٣٥٥٧) حضرت فضیل (رض) فرماتے ہیں کہ حضرت عمر بن عبدالعزیز (رض) عطیہ مقرر نہیں فرماتے تھے مگر قرآن پڑھنے والے شخص کے لیے۔ راوی کہتے ہیں : کہ میرے والد بھی ان لوگوں میں سے تھے جو قرآن پڑھتے تھے۔ تو آپ (رض) نے ان کے لیے عطیہ مقرر فرمایا۔

(٣٣٥٥٨) حضرت یسیر بن عمرو (رض) فرماتے ہیں کہ حضرت سعد بن مالک (رض) نے قرآن پڑھنے والوں کے لیے دو دو ہزار کا عطیہ مقرر فرمایا۔ یہ خبر حضرت عمر (رض) کو پہنچی تو آپ (رض) نے ان کی طرف خط لکھا : کہ وہ قرآن پڑھنے پر اجرت مت عطا کریں۔

(٣٣٥٥٩) حضرت سعید بن المسیب (رض) فرماتے ہیں کہ جب بچہ رونے لگتا تو حضرت عمر (رض) اس کا عطیہ مقرر فرما دیتے۔

(٣٣٥٦٠) حضرت عنترہ (رض) فرماتے ہیں کہ میں حضرت عثمان کے پاس حاضر تھا آپ (رض) لوگوں کے عطیات میں توقف کرتے تھے۔ اگر آپ (رض) سے کہا جاتا : کہ فلاں عورت نے رات کو بچہ پیدا کیا تو آپ (رض) فرماتے : ذرا ٹھہرو، اس نے بچے کو جنم دیا ہے یا بچی کو، اس کا پتہ جلد چل جائے گا اور خبر معروف ہوجائے گی۔

(٣٣٥٦١) حضرت محمد بن زید (رض) فرماتے ہیں کہ ان کے والد حضرت زید (رض) نے ارشاد فرمایا : کہ جب کسی کے بچہ پیدا ہوتا تو حضرت عمر (رض) اس کے عطیہ میں سو درہم کا اضافہ فرما دیتے۔

(٣٣٥٦٢) حضرت ابو الجحاف داؤد بن ابی عوف (رض) فرماتے ہیں کہ قبیلہ خثعم کے ایک آدمی نے بیان کیا : کہ رات کو میرے گھر بچہ پیدا ہوا۔ پس جب صبح ہوئی تو میں حضرت علی (رض) کے پاس آیا ، آپ (رض) نے اس کے لیے سو درہم کا اضافہ فرما دیا۔

(٣٣٥٦٣) حضرت بشر بن غالب (رض) فرماتے ہیں : حضرت ابن زبیر (رض) نے حضرت حسن بن علی (رض) سے بچہ کے متعلق سوال کیا ؟ تو آپ (رض) نے فرمایا : جب بچہ رونے یا چلانے لگے تو اس کا ماہانہ عطیہ واجب ہوجائے گا۔

(٣٣٥٦٤) حضرت فطر (رض) فرماتے ہیں کہ میں حضرت زید بن علی (رض) کے ساتھ بیٹھا ہوا تھا میں نے پوچھا : اس بندے عمر بن عبدالعزیز کا تمہارے ساتھ برتاؤ کیسا ہے ؟ تو ان کا ایک چھوٹا بیٹا گزرا۔ انھوں نے فرمایا : اللہ ان کو جزائے خیر عطا فرمائے۔ تحقیق انھوں نے اس کے لیے میرے عطیہ میں دو ہزار کا اضافہ فرما دیا۔

(٣٣٥٦٥) حضرت اسماعیل بن شعیب سمان (رض) فرماتے ہیں کہ حضرت ام العلاء (رض) نے ارشاد فرمایا : کہ میرے والد مجھے حضرت علی (رض) کے پاس لے کر گئے ، تو آپ (رض) نے میرے لیے عطیہ میں حصہ مقرر فرما دیا حالانکہ میں چھوٹی بچی تھی۔ اور آپ (رض) نے فرمایا : وہ بچہ جو کھانا کھاتا ہو اور روٹی کے ٹکڑے کو چباتا ہو وہ اس عطیہ کا زیادہ حقدار ہے اس نومولود سے جو پستان چوستا ہے۔

(٣٣٥٦٦) حضرت جعفر کے والد (رض) فرماتے ہیں کہ حضرت عمر (رض) نے لوگوں کے لیے عطیہ مقرر کرنے کا ارادہ فرمایا : اور آپ (رض) کی رائے ان سب لوگوں کی رائے سے بہتر تھی۔ لوگوں نے کہا : آپ (رض) اپنے آپ سے ابتدا کریں۔ آپ (رض) نے فرمایا : نہیں ! پھر آپ (رض) نے ابتدا کی ان لوگوں سے جو رسول اللہ (صلی اللہ علیہ وآلہ وسلم) سے رشتہ میں قریب تھے اور پھر جو ان کے بعد قریب تھے۔ آپ (رض) نے حضرت عباس (رض) کا حصہ مقرر فرمایا۔ پھر حضرت علی (رض) کا یہاں تک کہ آپ (رض) نے پانچ قبیلوں کے درمیان لگا تار حصہ مقرر فرمایا۔ یہاں تک کہ آپ (رض) قبیلہ بنو عدی تک پہنچے۔

(٣٣٥٦٧) حضرت عُلَی بن رباح (رض) فرماتے ہیں کہ حضرت عمر بن خطاب (رض) نے جابیہ کے مقام پر لوگوں سے خطاب فرمایا : پس آپ (رض) نے اللہ کی حمدو ثنا بیان کی پھر ارشاد فرمایا : جو شخص چاہتا ہے کہ وہ قرآن کے متعلق پوچھے تو اس کو چاہیے کہ وہ حضرت ابیّ بن کعب (رض) کی خدمت میں آئے ۔ اور جو چاہتا ہے کہ وہ وراثت کے حصوں کے متعلق پوچھے تو اس کو چاہیے کہ وہ حضرت زید بن ثابت (رض) کی خدمت میں آئے۔ اور جو شخص چاہتا ہے کہ وہ فقہ سے متعلق پوچھے تو اس کو چاہیے کہ وہ حضرت معاذ بن جبل (رض) کی خدمت میں آئے اور جو شخص چاہتا ہے وہ مال سے متعلق پوچھے تو اس کو چاہیے کہ وہ میرے پاس آئے۔ بیشک اللہ تعالیٰ نے مجھے خزانچی اور تقسیم کرنے والا بنایا ہے۔ خبردار میں سب سے پہلے مہاجرین اولین سے ابتدا کروں گا۔ میں اور میرے اصحاب ان کو عطایا دیں گے۔ پھر میں انصار سے ابتدا کروں گا جنہوں نے ایمان کو جگہ فراہم کی اور ایمان پر قائم رہے۔ پس میں اور میرے اصحاب ان کو عطایا دیں گے۔ پھر میں نبی کریم (صلی اللہ علیہ وآلہ وسلم) کی ازواج مطہرات سے ابتدا کروں گا اور ان کو عطایا دوں گا۔ اور جس نے ہجرت میں جلدی کی تو عطیہ بھی اس کی طرف جلدی کرے گا ۔ اور جو ہجرت میں سست ہوا تو عطیہ میں بھی سستی ہوگی۔ تم میں کوئی ہرگز ملامت نہیں کرے گا مگر اپنی سواری کے بیٹھنے کی جگہ پر۔

(٣٣٥٦٨) حضرت محمد بن ابراہیم بن حارث تیمی (رض) جن کے دادا مہاجرین میں سے تھے یہ فرماتے ہیں کہ حضرت ابوہریرہ (رض) نے ارشاد فرمایا : کہ میں بحرین کے حاکم کی خدمت میں وفد لے کر گیا تو اس نے میرے ساتھ آٹھ لاکھ درہم حضرت عمر (رض) بن خطاب (رض) کی خدمت میں بھیجے۔ میں ان کو لے کر حضرت عمر (رض) کے پاس آیا۔ آپ (رض) نے پوچھا : اے ابوہریرہ : تم کیا چیز لائے ہو ؟ میں نے عرض کیا : آٹھ لاکھ درہم لایا ہوں ۔ آپ (رض) نے فرمایا : تم جانتے ہو کہ تم کیا کہہ رہے ہو ؟ یقیناً تم تو دیہاتی ہو۔ حضرت ابوہریرہ (رض) فرماتے ہیں کہ میں نے اپنے ہاتھ سے اس مال کو شمار کیا، یہاں تک کہ میں نے اس کو پورا کیا۔ پھر حضرت عمر (رض) نے مہاجرین کو بلایا اور ان سے مال کے بارے میں مشورہ طلب کیا ۔ ان سب نے مختلف آراء دیں۔ آپ (رض) نے فرمایا : تم لوگ میرے پاس سے اٹھ جاؤ۔ یہاں تک کہ جب ظہر کا وقت آیا تو آپ (رض) نے ان لوگوں کو قاصد بھیج کر بلایا۔ اور فرمایا : کہ میں اپنے ساتھیوں میں سے ایک آدمی سے ملا تو اس کی رائے میں کوئی انتشار نہیں تھا۔ اس نے یہ آیت پڑھی : ترجمہ : جو کچھ پلٹا دے اللہ اپنے رسول کی طرف بستیوں کے لوگوں سے وہ مال اللہ اور اس کے رسول کا ہے۔ اور رسول کے رشتہ داروں کا اور یتیموں کا اور مسکینوں اور مسافروں کا ہے۔ لہٰذا حضرت عمر (رض) نے قرآن مجید کے مطابق اس مال کو تقسیم فرما دیا۔