(٢٢٢٠٧) حضرت شعبی (رض) سے مروی ہے کہ آنحضرت (صلی اللہ علیہ وآلہ وسلم) نے اس یہودی کو رجم فرمایا تھا جس کو یہود نے ایک یہودی اور منافق کے ساتھ بھیجا تھا۔

(٢٢٢٠٨) حضرت جابر بن سمرہ (رض) سے مروی ہے کہ آنحضرت (صلی اللہ علیہ وآلہ وسلم) نے ایک یہودی مرد اور خاتون کو رجم فرمایا۔

(٢٢٢٠٩) حضرت برائ (رض) سے مروی ہے کہ آنحضرت (صلی اللہ علیہ وآلہ وسلم) نے ایک یہودی کو رجم فرمایا۔

(٢٢٢١٠) حضرت جابر بن عبداللہ (رض) فرماتے ہیں کہ آنحضرت (صلی اللہ علیہ وآلہ وسلم) نے ایک یہودی مرد اور خاتون کو رجم فرمایا۔

(٢٢٢١١) حضرت ابن عمر (رض) سے مروی ہے کہ آنحضرت (صلی اللہ علیہ وآلہ وسلم) نے دو یہودیوں کو رجم فرمایا۔ میں بھی ان لوگوں میں سے ہوں جنہوں نے ان کو رجم کیا تھا۔

(٢٢٢١٢) حضرت کردوس (رض) سے مروی ہے کہ ایک نوجوان کو شراب کی وجہ سے حد لگائی گئی، پھر اس نے حضرت شریح (رض) کے پاس گواہی دی، انھوں نے اس کے بارے میں مجھ سے دریافت کیا ؟ میں نے عرض کیا ہمارے نوجوانوں میں سے اچھا ہے۔ تو آپ نے اس کی گواہی کو قبول فرمایا۔

(٢٢٢١٣) حضرت عمر (رض) نے حضرت ابو موسیٰ اشعری (رض) کو تحریر فرمایا کہ شرابی اگر توبہ کرلے تو اس کی گواہی قبول کرلو۔

(٢٢٢١٤) حضرت شعبی (رض) نے ایسے شخص کی گواہی قبول فرمائی جس کو شراب کی وجہ سے حد لگائی گئی تھی۔

(٢٢٢١٥) حضرت عمر بن عبد العزیز (رض) نے بھائی کی گواہی بھائی کے حق میں قبول فرمائی۔

(٢٢٢١٦) حضرت عطاء بن ابی رباح (رض) سے مروی ہے کہ محلہ کے دو آدمیوں کے درمیان جھگڑا ہوگیا، ان میں سے ایک کے لیے اس کے بھائی نے حضرت شریح (رض) کے سامنے گواہی دی، دوسرے شخص نے کہا کہ تو اس کا بھائی ہے، حضرت شریح (رض) نے دریافت فرمایا کہ : کیا تیرے لیے کوئی چیز ہے اس شخص سے کہ تو اس پر گواہی دے ؟ اس نے کہا کہ نہیں۔ آپ نے خصم سے فرمایا پھر کس چیز کی وجہ سے تو اس کی گواہی کو رد کررہا ہے ؟

(٢٢٢١٧) حضرت شعبی (رض) فرماتے ہیں کہ سب سے قریبی رشتہ دار کہ جس کی گواہی جائز ہے وہ ایک بھائی کی دوسرے بھائی کے لیے گواہی ہے۔

(٢٢٢١٨) حضرت ابراہیم (رض) بھائی کی گواہی بھائی کے حق میں قبول ( معتبر) سمجھتے تھے۔

(٢٢٢١٩) حضرت شعبی (رض) سے اسی طرح مروی ہے۔

(٢٢٢٢٠) حضرت ابن زبیر (رض) نے بھائی کی گواہی کو بھائی کے حق میں معتبر قرار دیا۔

(٢٢٢٢١) حضرت حسن (رض) بھائی کی گواہی بھائی کے حق میں معتبر سمجھتے تھے۔

(٢٢٢٢٢) حضرت شریح (رض) فرماتے ہیں کہ بھائی اگر عادل ہو تو اس کی گواہی بھائی کے حق میں معتبر ہے۔

(٢٢٢٢٣) حضرت شریح (رض) نے بھائی کی گواہی بھائی کے حق میں قبول فرمائی۔

(٢٢٢٢٤) حضرت حارث (رض) سے مروی ہے کہ ایک شخص نے حضرت شریح (رض) کے سامنے قسم اٹھانے سے انکار کردیا، حضرت شریح (رض) نے فیصلہ فرما دیا، اس شخص نے عرض کیا کہ میں قسم اٹھاتا ہوں ، حضرت شریح (رض) نے فرمایا میرا فیصلہ اب ہوچکا ہے۔

(٢٢٢٢٥) حضرت ابن عباس (رض) نے ایک خاتون سے قسم اٹھانے کا کہا، اس نے قسم اٹھانے سے انکار کردیا، تو انھوں نے وہ قسم اس کو لازم کردی۔ (یعنی بغیر قسم کے اس کے حق فیصلہ نہیں کیا جائے گا)

(٢٢٢٢٦) حضرت ابن عمر (رض) نے آٹھ سو درہم کا ایک غلام فروخت فرمایا۔ مشتری نے اس میں عیب پایا، وہ جھگڑا لے کر حضرت عثمان (رض) کی خدمت میں حاضر ہوا۔ حضرت عثمان (رض) نے دریافت فرمایا کہ : آپ نے عیب سے بری ہو کر فروخت کیا تھا ؟ انھوں نے قسم اٹھانے سے انکار کردیا، حضرت عثمان (رض) نے غلام ان کو واپس لٹا دیا۔