(١٩١٨١) حضرت سعید بن مسیب (رض) فرماتے ہیں کہ وہ عورت جس کا خاوند فوت ہوجائے یا جسے طلاق دے دی جائے وہ نہ حج کرے، نہ عمرہ کرے اور جسم کے ساتھ جڑا ہوا کپڑا بھی نہ پہنے۔

(١٩١٨٢) حضرت ابن عمر (رض) نے اس عورت کو ڈانٹا تھا جو اپنی عدت میں حج کے لیے گئی۔

(١٩١٨٣) حضرت جابر (رض) فرماتے ہیں کہ حضرت عمر بن خطاب (رض) نے ان عورتوں کو ذو الحلیفہ سے واپس بھیج دیا تھا جو حج کرنے گئی تھیں جبکہ ان کے خاوند وہاں شہید کردیئے گئے تھے۔

(١٩١٨٤) حضرت سعید بن مسیب (رض) فرماتے ہیں کہ حضرت عمر (رض) نے ان عورتوں کو بیداء سے واپس بھیج دیا تھا جن کے خاوند انتقال کرگئے تھے اور انھیں حج سے روک دیا تھا۔

(١٩١٨٥) حضرت عطائ (رض) فرماتے ہیں کہ حضرت عائشہ (رض) نے حضرت ام کلثوم (رض) کو ان کی عدت میں حج کرایا۔

(١٩١٨٦) حضرت ابن عباس (رض) اس بات میں کوئی حرج نہیں سمجھتے تھے کہ عورتیں اپنی عدت میں حج کریں۔

(١٩١٨٧) حضرت حبیب معلم (رض) فرماتے ہیں کہ میں نے حضرت عطائ (رض) سے سوال کیا کہ کیا عورت اپنی عدت میں حج کرسکتی ہے۔ انھوں نے فرمایا ہاں کرسکتی ہے۔ حضرت حبیب (رض) فرماتے ہیں کہ حضرت حسن (رض) بھی یہی فرمایا کرتے تھے۔

(١٩١٨٨) حضرت ابو سعید خدری (رض) کی بہن حضرت فریعہ بنت مالک (رض) فرماتی ہیں کہ میرے خاوند اپنے عجمی غلاموں کی تلاش میں نکلے جو کہ فرار ہوگئے تھے۔ وہ انھیں مقام قدوم میں ملے جہاں انھوں نے میرے خاوند کو شہید کردیا۔ جب مجھے میرے خاوند کے انتقال کی خبر ملی تو اس وقت میں میں انصار کے ایک گھر میں تھی جو میرے اہل و عیال کے گھروں سے دور تھا۔ میں رسول اللہ (صلی اللہ علیہ وآلہ وسلم) کی خدمت میں حاضر ہوئی اور میں نے عرض کیا کہ مجھے میرے خاوند کے انتقال کی خبر آپہنچی ہے اور میں ایک ایسے گھر میں ہوں جو میرے والدین اور میرے بھائیوں کے گھر سے دور ہے۔ میرے خاوند نے میرے لیے پیسے بھی نہیں چھوڑے جو مجھ پر خرچ کئے جائیں، نہ مال ہے جس کی میں وارث بنوں اور نہ ہی کوئی ایسا گھر ہے جس کے وہ مالک ہیں۔ اگر آپ مجھے اجازت دیں تو میں اپنے والدین اور اپنے بھائیوں کے گھر چلی جاؤں۔ یہ مجھے زیادہ پسند ہے اور اس میں میرے لیے زیادہ فائدہ ہے۔ آپ (صلی اللہ علیہ وآلہ وسلم) نے فرمایا کہ تم جو چاہو کرلو۔ حضرت فریعہ (رض) فرماتی ہیں کہ رسول اللہ (صلی اللہ علیہ وآلہ وسلم) کا یہ فیصلہ سن کر میں اس حال میں باہر آئی کہ میری آنکھیں ٹھنڈی تھیں۔ پھر اس کے بعد میں مسجد میں تھی یا کسی کمرے میں تھی کہ رسول اللہ (صلی اللہ علیہ وآلہ وسلم) نے مجھے بلایا اور فرمایا کہ تم نے کیا فیصلہ کیا ؟ میں نے سارا واقعہ سنایا تو آپ نے فرمایا کہ اس گھر میں ہی ٹھہری رہو جس میں تمہارے خاوند کے انتقال کی خبر آئی تھی یہاں تک کہ مدت پوری ہوجائے۔ وہ فرماتی ہیں کہ پھر میں نے چار مہینے اور دس دن وہیں گزارے۔

(١٩١٨٩) حضرت علقمہ (رض) فرماتے ہیں کہ ہمدان کی کچھ عورتوں کے خاوندقتل کردیئے گئے تو حضرت عبداللہ (رض) نے انھیں حکم دیا کہ وہ دن کو جمع ہوجایا کریں اور رات اپنے گھروں میں گزارا کریں۔

(١٩١٩٠) حضرت ابراہیم (رض) فرماتے ہیں کہ ہمدان کی کچھ عورتوں کے خاوند قتل کردیئے گئے۔ انھوں نے ارادہ کیا کہ ان میں سے ایک عورت کے گھر میں عدت گزار لیں۔ اس بارے میں سوال کرنے کے لیے انھوں نے حضرت عبداللہ بن مسعود (رض) کے پاس کسی کو بھیجا۔ آپ (رض) نے فرمایا کہ ہر عورت اپنے گھر میں عدت گزارے۔

(١٩١٩١) حضرت مسیکہ (رض) فرماتی ہیں کہ ایک عورت عدت میں اپنے گھروالوں سے ملاقات کرنے گئی۔ وہاں اس کے بچے کی ولادت کا وقت قریب آگیا۔ ان لوگوں نے مجھے حضرت عثمان (رض) کے پاس بھیجا کہ میں ان سے اس بارے میں سوال کروں۔ اس وقت وہ عشاء کی نماز پڑھ کر اپنے بستر پر جاچکے تھے۔ میں نے ان سے عرض کیا کہ فلاں عورت اپنی عدت میں اپنے گھروالوں سے ملاقات کے لیے گئی تھی وہاں اسے بچے کی پیدائش کا درد ہونے لگا ہے۔ آپ اس کے بارے میں مجھے کیا حکم دیتے ہیں ؟ انھوں نے فرمایا کہ اسے اسی حال میں اس کے گھر لے جایا جائے۔

(١٩١٩٢) حضرت ابن ثوبان (رض) فرماتے ہیں کہ ایک عورت کے خاوند کا انتقال ہوگیا اور وہ فاقہ کا شکار تھی۔ اس نے حضرت عمر (رض) سے اجازت چاہی کہ وہ اپنے گھروالوں کے پاس چلی جائے۔ حضرت عمر (رض) نے اسے اس بات کی رخصت دے دی کہ دن کی روشنی میں وہاں چلی جایا کرے۔

(١٩١٩٣) حضرت محمد بن عبدالرحمن (رض) فرماتے ہیں کہ انصار کی ایک عورت کا خاوند فوت ہوگیا۔ اس نے اپنے گھر والوں کے پاس جانے کے بارے میں حضرت زید بن ثابت (رض) سے سوال کیا تو انھوں نے اسے روشنی میں ان کے پاس جانے کی اجازت دے دی۔

(١٩١٩٤) حضرت ابراہیم (رض) فرماتے ہیں کہ ایک عورت کا خاوند فوت ہوگیا تھا اور وہ عدت میں تھی۔ اس دوران اس عورت کے والد بیمار ہوگئے۔ اس نے حضرت ام سلمہ (رض) کو پیغام بھیج کر سوال کیا کہ کیا وہ اپنے والد کی تیمارداری کے لیے جاسکتی ہے ؟ انھوں نے فرمایا کہ اگر دن کے ایک کنارے میں اپنے گھر میں رہو تو جاسکتی ہو۔

(١٩١٩٥) حضرت ابراہیم (رض) فرماتے ہیں کہ جس عورت کا خاوند فوت ہوگیا ہو وہ اپنے گھر کے علاوہ کہیں رات نہیں رہ سکتی۔

(١٩١٩٦) حضرت نافع (رض) فرماتے ہیں کہ ایک عورت جس کا خاوند فوت ہوگیا تھا اس نے عدت کے دنوں میں سے ایک دن اپنے گھر کے علاوہ کہیں گزارا۔ حضرت ابن عمر (رض) نے اسے وہ دن قضا کرنے کا حکم دیا۔

(١٩١٩٧) حضرت ہشام بن عروہ (رض) فرماتے ہیں کہ میں نے اپنے والد سے سوال کیا کہ وہ عورت جس کا خاوند فوت ہوگیا ہو کیا وہ شہر چھوڑ سکتی ہے ؟ انھوں نے فرمایا نہیں۔ البتہ اگر اس کے گھر والے چھوڑ رہے ہوں تو چھوڑ سکتی ہے۔

(١٩١٩٨) حضرت خصیف (رض) فرماتے ہیں کہ میں نے حضرت سعید بن مسیب (رض) سے سوال کیا کہ جس عورت کا خاوند فوت ہوگیا ہو کیا وہ اپنے گھر سے نکل سکتی ہے ؟ انھوں نے فرمایا نہیں۔

(١٩١٩٩) حضرت حکم (رض) فرماتے ہیں کہ حضرت عمر (رض) اور حضرت عبداللہ (رض) فرمایا کرتے تھے کہ وہ گھر تبدیل نہیں کرسکتی۔

(١٩٢٠٠) حضرت عبداللہ (رض) کے شاگرد فرمایا کرتے تھے کہ جس عورت کا خاوند فوت ہوگیا ہو وہ اپنی عدت پوری کئے بغیر خاوند کے گھر سے نہیں نکل سکتی۔