1199 ۔ یہی روایت بعض دیگراسناد کے ہمراہ اسی طرح منقول ہے تاہم اس میں یہ الفاظ ہیں :

'' (یوں لگتا ہے ) گویا تم میرے پیچھے قرات کرتے ہو۔ ہم نے عرض کیا جی ہاں۔ یارسول اللہ تیزی کے ساتھ ہم قرات کرتے ہیں نبی کریم (صلی اللہ علیہ وآلہ وسلم) نے فرمایا تم ایسانہ کرو، البتہ سورة فاتحہ پڑھ لیا کرو کیونکہ اس کے بغیر نماز نہیں ہوتی ہے۔

1200 ۔ یہی روایت بعض دیگراسناد کے ہمراہ بھی منقول ہے۔

1201 ۔ یہی روایت بعض دیگراسناد کے ہمراہ منقول ہیں تاہم اس میں یہ الفاظ ہیں :

'' نبی کریم (صلی اللہ علیہ وآلہ وسلم) نے ارشاد فرمایا میرا خیال ہے تم لوگ اپنے امام کے پیچھے قرات کرتے ہو جب وہ بلند آواز سے قرات کررہا ہوتا ہے۔ ہم نے عرض کی جی ہاں یارسول اللہ اللہ کی قسم ہم تیزی سے پڑھ لیتے ہیں نبی کریم (صلی اللہ علیہ وآلہ وسلم) نے فرمایا تم ایسانہ کیا کرو البتہ سورة فاتحہ پڑھ لیا کرو کیونکہ جو شخص اسے نہیں پڑھتا اس کی نماز نہیں ہوتی۔

1202 ۔ حضرت نافع بن محمود بیان کرتے ہیں : ایک مرتبہ حضرت عبادہ بن صامت (رض) صبح کی نماز میں تاخیر سے پہنچے ابونعیم نامی موذن نے نماز کے لیے اقامت کہہ دی ابونعیم وہ پہلے فرد ہیں جنہوں نے بیت المقدس میں اذان دی تھی ، ابونعیم لوگوں کو نماز پڑھانے لگے اسی دوران حضرت عبادہ بن صامت آگئے میں ان کے ساتھ تھا، ہم نے ابونعیم کی اقتداء میں صف قائم کرلی ابونعیم نے بلند آواز میں قرات کرنا شروع کی تو حضرت عبادہ بھی سورة فاتحہ پڑھنے لگے۔

(راوی کہتے ہیں) جب انھوں نے نماز مکمل کرلی تو میں نے حضرت عبادہ (رض) سے کہا آپ نے ایک ایساعمل کیا ہے جس کے بارے میں مجھے اندازہ نہیں ہوسکا کہ کیا یہ سنت ہے ؟ یا آپ نے غلطی سے ایسا کرلیا ہے ؟ حضرت عبادہ نے دریافت کیا وہ کون سا ہے ؟ راوی کہتے ہیں میں نے آپ کو سورت فاتحہ پڑھنے ہوئے سنا ہے جبکہ ابونعیم بلند آواز سے قرات کررہے تھے توحضڑت عبادہ (رض) نے فرمایا ایسا ہی ہے نبی کریم (صلی اللہ علیہ وآلہ وسلم) نے ہمیں ایک نماز پڑھائی جس میں بلند آواز سے قرات کی جاتی ہے تو اس دوران آپ کو قرات کرنے میں دشواری ہوئی جب آپ (صلی اللہ علیہ وآلہ وسلم) نماز پڑھ کر فارغ ہوئے تو آپ نے ہماری طرف رخ کیا اور ارشاد فرمایا ، جب میں بلند آواز میں قرات کررہا تھا تو کیا تم بھی قرات کررہے تھے ؟ تو ہم میں سے بعض حضرات نے کہا ہم نے ایسا کیا ہے ، تو نبی کریم (صلی اللہ علیہ وآلہ وسلم) نے ارشاد فرمایا تم ایسانہ کرو میں بھی یہ سوچ رہا تھا کہ کیا قرآن کے حوالے سے میرے ساتھ مقابلہ کیا جارہا ہے جب میں بلند آواز میں قرات کررہاہوں تو تم قرآن کی قرات نہ کیا کرو البتہ سورة فاتحہ پڑھ لیا کرو۔

اس روایت کے تمام راوی ثقہ ہیں۔

1203 ۔ ابونعیم بیان کرتے ہیں حضرت عبادہ بن صامت (رض) نے نبی کریم (صلی اللہ علیہ وآلہ وسلم) کا یہ فرمان نقل کیا ہے کیا تم لوگ میرے ساتھ نماز ادا کرتے ہوئے قرات کرتے ہو ؟ ہم نے عرض کی جی ہاں ۔ نبی کریم (صلی اللہ علیہ وآلہ وسلم) نے فرمایا تم ایسانہ کرو ہاں البتہ سورة فاتحہ پڑھ لیا کرو۔

یہی روایت ایک اور سند کے ہمراہ بھی منقول ہے۔

1204 ۔ حضرت عبادہ بن صامت (رض) بیان کرتے ہیں نبی کریم (صلی اللہ علیہ وآلہ وسلم) نے ہم سے دریافت کیا کیا تم لوگ میرے ساتھ قرات کرتے ہو، جب میں نماز پڑھ رہا ہوتا ہوں ؟ ہم نے عرض کیا ہم قرات کرتے ہیں لیکن ہم تیزی سے پڑھ لیتے ہیں نبی کریم (صلی اللہ علیہ وآلہ وسلم) نے ارشاد فرمایا تم قرات نہ کیا کرو البتہ سورة فاتحہ پڑھ لیاکرو اور وہ بھی دل میں پڑھا کرو۔ یہ روایت مرسل ہے۔

1205 ۔ نافع بن محمود بیان کرتے ہیں انھوں نے حضرت عبادہ بن صامت (رض) کو (باجماعت نماز میں ) سورة فاتحہ پڑھتے ہوئے سنا، ابونعیم (امام صاحب) بلند آواز سے قرات کررہے تھے (نماز سے فارغ ہونے کے بعد میں نے حضرت عبادہ سے کہا) میں نے آپ کو نماز کے دوران ایک ایساعمل کرتے ہوئے دیکھا ہے (جس پر مجھے حیرانگی ہوئی ہے) حضرت عبادہ (رض) نے دریافت کیا : وہ کون سا ہے ؟ نافع نے کہا میں نے آپ کو سورة فاتحہ پڑھتے ہوئے سنا ہے حالانکہ امام بلند آواز میں قرات کررہے تھے تو حضرت عبادہ نے فرمایا جی ہاں نبی کریم (صلی اللہ علیہ وآلہ وسلم) نے ہمیں ایک نماز پڑھائی جس میں آپ نے بلند آواز میں قرات کی جب آپ (صلی اللہ علیہ وآلہ وسلم) نماز پڑھ کر فارغ ہوئے تو آپ نے فرمایا جب میں بلند آواز میں قرات کررہا تھا کیا تم میں سے کوئی شخص قرآن کی تلاوت کررہا تھا ؟ ہم نے عرض کی جی ہاں۔ یارسول اللہ ۔ نبی کریم (صلی اللہ علیہ وآلہ وسلم) نے ارشاد فرمایا میں بھی یہ سوچ رہا تھا کہ کیا قرآن میں میرے ساتھ مقابلہ کیا جارہا ہے ، تم میں سے کوئی بھی شخص قرآن کا کوئی بھی حصہ نہ پڑھے اس وقت جب میں بلند آواز میں قرات کررہاہوں البتہ سورة فاتحہ پڑھ لیاکرو۔

اس روایت کی سند ' حسن ہے اور اس کے تمام راوی ثقہ ہیں یہی روایت ایک اور سند کے ہمراہ بھی منقول ہے۔

1206 ۔ نافع بن محمود بیان کرتے ہیں : میں حضرت عبادہ بن صامت (رض) کی خدمت میں حاضر ہوا تو انھوں نے نبی کریم (صلی اللہ علیہ وآلہ وسلم) کے حوالے سے یہ حدیث ذکر کی ہے (اس کے بعد حسب سابق حدیث ہے) ۔ تاہم اس میں یہ الفاظ ہیں (نبی کریم (صلی اللہ علیہ وآلہ وسلم) نے ارشاد فرمایا) ۔

'' تم میں سے کوئی بھی شخص ہرگز قرات نہ کرے البتہ سورت فاتحہ پڑھ لیاکرے کیونکہ جو شخص اسے نہیں پڑھتا اس کی نماز نہیں ہوتی۔

1207 ۔ حضرت محمود بن ربیع انصاری (رض) بیان کرتے ہیں : حضرت عبادہ بن صامت (رض) میرے ساتھ آکر کھڑے ہوئے اور انھوں نے امام کی اقتداء میں قرات شروع کردی حالانکہ امام بھی اس وقت قرات کررہا تھا جب وہ نماز پڑھ کر فارغ ہوئے تو میں نے ان سے کہا ابو ولید ! آپ بھی قرات کرنے لگ پڑے تھے حالانکہ آپ سن رہے تھے کہ امام بلند آواز میں قرات کررہا ہے تو حضرت عبادہ بن صامت نے فرمایا جی ہاں۔ ایک مرتبہ ہم نے نبی کریم (صلی اللہ علیہ وآلہ وسلم) کی اقتداء میں اسی طرح قرات کی تو نبی کریم (صلی اللہ علیہ وآلہ وسلم) کو قرات میں دشواری ہوئی پھر آپ (صلی اللہ علیہ وآلہ وسلم) نے سبحان اللہ کہا، جب آپ (صلی اللہ علیہ وآلہ وسلم) نماز پڑھ کر فارغ ہوئے تو آپ (صلی اللہ علیہ وآلہ وسلم) نے ہم سے فرمایا کیا کوئی شخص میرے ساتھ قرات کررہا تھا۔ ؟ ہم نے عرض کیا جی ہاں نبی کریم (صلی اللہ علیہ وآلہ وسلم) نے فرمایا میں بھی حیران ہورہا تھا میں یہ سوچ رہا تھا کہ کون شخص میرے ساتھ قرآن میں مقابلہ کررہا ہے جب امام قرات کررہاہو تو تم اس کے ساتھ قرات نہ کیا کروالبتہ سورة فاتحہ پڑھ لیاکرو کیونکہ جو شخص اسے نہیں پڑھتا اس کی نماز نہیں ہوتی۔

معاویہ اور اسحاق بن ابوفروہ نامی راوی ضعیف ہیں۔

1208 ۔ عمرو بن شعیب اپنے والد کے حوالے سے ، اپنے دادا کا یہ بیان نقل کرتے ہیں نبی کریم (صلی اللہ علیہ وآلہ وسلم) نے یہ بات ارشاد فرمائی ہے جو شخص فرض یانفل نماز ادا کررہا ہو، وہ اس میں سورة فاتحہ پڑھے اور اس کے ساتھ ایک سورت کی تلاوت کرے اگر وہ صرف سورت فاتحہ پڑھتا ہے تو یہ بھی اس کے کافی ہوگی، اور جو شخص امام کے ساتھ نماز ادا کررہا ہو جس میں امام بلند آواز سے قرات کررہاہو تو اسے چاہیے کہ امام کے سکوت کے دوران سورة فاتحہ پڑھ لے اگر وہ ایسا نہیں کرے گا تو اس کی نماز نامکمل ہوگی پوری نہیں ہوگی۔

محمد بن عبداللہ بن عبید بن عمیر نامی راوی ضعیف ہے۔

1209 ۔ حضرت ابوہریرہ (رض) بیان کرتے ہیں : نبی کریم (صلی اللہ علیہ وآلہ وسلم) نے انھیں ہدایت کی تھی کہ وہ جاکرلوگوں میں یہ اعلان کریں نماز اس وقت تک نہیں ہوتی جب تک سورة فاتحہ نہ پڑھ لی جائے اور مزید تلاوت نہ کی جائے۔

1210 ۔ محمد بن ربیع بیان کرتے ہیں حضرت عبادہ بن صامت (رض) نے یہ بات نقل کی ہے ، نبی کریم (صلی اللہ علیہ وآلہ وسلم) نے یہ بات ارشاد فرمائی ہے اس شخص کی نماز نہیں ہوتی جو سورة فاتحہ نہیں پڑھتا۔

زیاد نامی راوی نے یہ الفاظ نقل کیے ہیں۔ اس شخص کی نماز درست نہیں ہوتی جو شخص اس میں سورة فاتحہ نہیں پڑھتا۔ اس حدیث کی سند صحیح ہے۔

1211 ۔ حضرت محمود بن ربیع، حضرت عبادہ بن صامت (رض) کا یہ بیان نقل کرتے ہیں نبی کریم (صلی اللہ علیہ وآلہ وسلم) نے یہ بات ارشاد فرمائی ہے '' اس شخص کی نماز نہیں ہوتی جو سو رہ فاتحہ نہیں پڑھتا ''۔

(یہ روایت بھی مستند ہے ) یہی روایت بعض دیگرراویوں نے بھی نقل کی ہے۔

1212 ۔ حضرت جابر بن عبداللہ (رض) بیان کرتے ہیں : نبی کریم (صلی اللہ علیہ وآلہ وسلم) نے ارشاد فرمایا امام ضامن ہوتا ہے جو وہ کرتے تم بھی وہ کرو۔

شیخ ابوحاتم نے یہ بات بیان کی ہے اس روایت سے ان لوگوں کے موقف کی تصیح ہوتی ہے جو اس بات کے قائل ہیں امام کی اقتداء میں قرات کی جائے گی۔

1213 ۔ محمود بن ربیع ، حضرت عبادہ بن صامت کے حوالے سے نبی کریم (صلی اللہ علیہ وآلہ وسلم) کا یہ فرمان نقل کرتے ہیں سورة فاتحہ دیگرتمام سورتوں کا عوض ہے ، لیکن کوئی دوسری سورت اس کا عوض نہیں ہوسکتی۔

اس روایت کو نقل کرنے میں محمد بن خلاد نامی راوی منفرد ہے۔

1214 ۔ حضرت علی (رض) یہ ہدایت کرتے تھے (راوی کو شک ہے شاید یہ الفاظ ہیں) یہ فرمایا کرتے تھے ۔ امام کی اقتداء میں پہلی دو رکعت میں سورة فاتحہ اور اس کے ساتھ کوئی سورت پڑھا کرو اور آخری دو رکعت میں صرف سورة فاتحہ پڑھ لیا کرو۔

1215 ۔ حضرت علی (رض) کے بارے میں یہ بات منقول ہے وہ اس بات کا حکم دیتے تھے (راوی کو شک ہے شاید یہ الفاظ ہیں) وہ اس بات کو پسند کرتے تھے ظہر اور عصر کی پہلی دو رکعت میں سورة فاتحہ اور اس کے ساتھ کوئی ایک سورت پڑھی جائے اور آخری دو رکعت میں صرف سورة فاتحہ پڑھی جائے اس وقت جب انسان امام کی اقتداء میں نماز ادا کررہاہو۔

اس روایت کی سند مستند ہے۔

1216 ۔ یہی روایت ایک اور سند کے ہمراہ بھی منقول ہے۔

1217 ۔ حضرت علی (رض) یہ ارشاد فرماتے ہیں ظہر اور عصر کی پہلی دو رکعت میں امام کی اقتداء میں سورة فاتحہ اور اس کے ساتھ کوئی سورت پڑھا کرو۔ اس کی سند مستند ہے۔

1218 ۔ امام ابوحنیفہ رحمہ اللہ تعالیٰ اپنی سند کے حوالے سے حضرت جابر (رض) کا یہ بیان نقل کرتے ہیں نبی کریم (صلی اللہ علیہ وآلہ وسلم) نے یہ بات ارشاد فرمائی جس شخص کا امام ہو (یعنی جو باجماعت نماز ادا کررہاہو) تو امام کی قرات اس شخص کی قرات کی ہوگی۔

اس روایت کو موسیٰ نامی راوی سے صرف امام ابوحنیفہ اور حسن نامی راوی نے نقل کیا ہے اور یہ دونوں ضعیف ہیں۔