٣٦٩٢٢۔۔۔ حضرت جریر (رض) کہتے ہیں : جب میں مدینہ منورہ کے قریب پہنچا میں نے اپنی سواری بٹھا دی اور پھر اپنے سامان کا تھیلا کھولا اور ایک اچھا سا جوڑا زیب تن کیا جب میں حاضر ہوا تو رسول اللہ (صلی اللہ علیہ وآلہ وسلم) خطاب فرما رہے تھے میں نے رسول اللہ (صلی اللہ علیہ وآلہ وسلم) پر سلام کیا : لوگوں نے مجھے کن انکھیوں سے گھورنا شروع کردیا میں نے اپنے پاس بیٹھے ہوئے شخص سے کہا : اے عبداللہ کیا : رسول اللہ (صلی اللہ علیہ وآلہ وسلم) نے میرے متعلق کچھ فرمایا ہے ؟ اس نے اثبات میں جواب دیا اور کہا : رسول اللہ (صلی اللہ علیہ وآلہ وسلم) نے تمہارا ذکر خیر کیا ہے کیا کہ اسی دوران رسول اللہ (صلی اللہ علیہ وآلہ وسلم) خطبہ ارشاد فرما رہے تھے اچانک آپ کو دروان خطبہ ہی کچھ عارضہ پیش آیا اور فرمایا : اچانک تمہارے پاس اس کونے سے یا اس دروازے سے ایک شخص داخل ہوگا جو عین والوں میں سب سے افضل ہے اس کے چہرے پر فرشتے کے مسح کا نشان ہوگا حضرت جریر کہتے ہیں : اس پر میں نے اللہ تعالیٰ حمد کی۔ (رواہ ابن ابی شیبہ والنسائی والطبرانی وابو نعیم)

٣٦٩٢٣۔۔۔ حضرت جریر (رض) فرماتے ہیں : رسول کریم (صلی اللہ علیہ وآلہ وسلم) نے مجھے فرمایا : کیا تم مجھے ذی خلصہ سے راحت نہیں پہچاتے۔ (ذی خلصہ دور جاہلیت میں قبیلہ حثعم کا ایک گھر تھا جسے وہ کعبہ یمانیہ کہتے تھے) میں نے عرض کیا : یا رسول اللہ ! میں گھوڑے کی پیٹھ پر ثابت قدم نہیں رہ سکتا۔ رسول اللہ (صلی اللہ علیہ وآلہ وسلم) نے میرے سینے پر ہاتھ پھیرا اور فرمایا : یا اللہ اسے ہدایت دینے والا اور ہدایت یافتہ بنا دے چنانچہ میں نے آپ کے دست اقدس کی ٹھنڈک محسوس کی۔ (رواہ ابن شیبہ)

٣٦٩٢٤۔۔۔ حضرت جریر (رض) کہتے ہیں : جب رسول اللہ (صلی اللہ علیہ وآلہ وسلم) کی خدمت میں وفود حاضر ہوئے آپ مجھے اپنے پاس بلاتے اور ان کے سامنے مجھ پر فخر کرتے۔ (رواہ ابن الطبرانی)

٣٦٩٢٥۔۔۔ حضرت جریر (رض) کہتے ہیں : رسول اللہ (صلی اللہ علیہ وآلہ وسلم) نے مجھے فرمایا : اے جریر ! اللہ تعالیٰ نے تمہیں خوبصورت بنایا ہے لہٰذا تم اپنے اخلاق کو بھی خوبصورت بناؤ۔ (رواہ الدیلمی)

٣٦٩٢٦۔۔۔ حضرت جریر (رض) کہتے ہیں جب رسول اللہ (صلی اللہ علیہ وآلہ وسلم) نے پیغام اسلام بھیجا میں آپ کی خدمت میں بیعت کرنے کے لیے حاضر ہوا آپ نے فرمایا : اے جریر تم کیوں آئے ہو ؟ میں نے عرض کیا : میں اس لیے حاضر ہوا ہوں تاکہ آپ کے دست اقدس پر اسلام قبول کروں آپ (صلی اللہ علیہ وآلہ وسلم) نے مجھے دعوت دی کہ میں گواہی دوں کہ اللہ کے سوا کوئی معبود نہیں اور میں اللہ کا رسول ہوں۔ نیز فرمایا : فرض نماز قائم کرو فرض زکوۃ دیتے رہو، اچھی اور بری تقدیر پر ایمان رکھو پھر آپ نے میری طرف اپنی چادر ڈال دی اور صحابہ (رض) کی طرف متوجہ ہو کر فرمایا جب تمہارے پاس کسی قوم کا کوئی شریف آدمی آئے اس کا اکرام کرو۔ (رواہ الطبرانی و ابونعیم)

٣٦٩٢٧۔۔۔ حضرت جریر (رض) کہتے ہیں : جب میں مدینہ پہنچا میں نے اپنی سواری بٹھائی اور تھیلا کھولا اور عمدہ جوڑا زیب تن کیا پھر رسول اللہ (صلی اللہ علیہ وآلہ وسلم) کی خدمت میں حاضر ہوا اس وقت رسول اللہ (صلی اللہ علیہ وآلہ وسلم) خطبہ ارشاد فرما رہے تھے میں نے نبی کریم (صلی اللہ علیہ وآلہ وسلم) کو سلام کیا، لوگ مجھے کن انکھیوں سے گھورنے لگے : میں نے اپنے قریب بیٹھے ہوئے ایک شخص سے کہا : اے عبداللہ ! کیا رسول اللہ (صلی اللہ علیہ وآلہ وسلم) نے میرا ذکر کیا ہے ؟ اس نے کہا : جی ہاں، رسول اللہ (صلی اللہ علیہ وآلہ وسلم) نے تمہارا ذکر خیر کیا ہے اسی اثناء میں رسول اللہ (صلی اللہ علیہ وآلہ وسلم) خطبہ ارشاد فرما رہے تھے کہ دوران خطبہ آپ کو کچھ عارضہ پیش آیا اور فرمایا عنقریب تمہارے پاس ایک شخص اس کونے سے یا فرمایا : اس دروازے سے داخل ہوگا جو یمن والوں میں سب سے بہتر ہوگا، خبردار، اس کے چہرے پر فرشتے کی مسح کا نشان ہے میں نے اس پر اللہ تعالیٰ کا شکر ادا کیا۔

٣٦٩٢٨۔۔۔ صابر بن سالم بن حمید بن یزید بن عبداللہ البجلی اپنے آباؤ اجداد کی سند سے ام قصاف بنت عبداللہ بن ضمرہ کہتی ہیں میرے والد عبداللہ بن ضمرہ نے مجھے حدیث سنائی کہ ایک دن وہ رسول اللہ (صلی اللہ علیہ وآلہ وسلم) کی خدمت میں حاضر تھے اور آپ کے صحابہ (رض) کی ایک جماعت بھی بیٹھی ہوئی تھی جس میں اکثریت اہل یمن کی تھی آپ (صلی اللہ علیہ وآلہ وسلم) نے فرمایا : عنقریب تمہارے اوپر ایک شخص اس گھاٹی سے نمودار ہوگا جو اہل یمن میں سب سے بہتر ہے کیا دیکھتے ہیں کہ حضرت جریر بن عبداللہ بجلی (رض) سامنے سے ظاہر ہوئے رسول اللہ (صلی اللہ علیہ وآلہ وسلم) اور صحابہ (رض) پر سلام کیا سب نے سلام کا جواب دیا پھر رسول اللہ (صلی اللہ علیہ وآلہ وسلم) نے جریر (رض) کے لیے اپنی چادر پھیلائی اور ان سے فرمایا : اے جریر ! اس پر بیٹھو صحابہ (رض) نے عرض کیا : یا رسول اللہ ! آپ نے بڑی گرمجوشی سے جریر کا استقبال کیا ہے حالانکہ آپ نے اس طرح کسی کا استقبال نہیں کیا۔ ارشاد فرمایا : جی ہاں یہ اپنی قوم کا شریف آدمی ہے اور جب تمہارے پاس کسی قوم کا شریف آدمی آئے اس کا اکرام کرو۔ (رواہ الدیلمی)

٣٦٩٢٩۔۔۔ ام قصاف بنت عبداللہ اپنے والد سے روایت نقل کرتی ہیں وہ کہتے ہیں : میں نبی کریم (صلی اللہ علیہ وآلہ وسلم) کے پاس بیٹھا ہوا تھا آپ نے فرمایا : اس کشادہ راستے سے تمہارے اوپر ایک شخص نمودار ہونے والا ہے جو یمن والوں میں سب سے بہتر ہے اس کے چہرے پر فرشتے کے ہاتھ پھیرنے کا واضح نشان ہے چنانچہ لوگ جھانک جھانک کر دیکھنے لگے، ہر ایک ہی چاہتا تھا کہ وہ اسی کے قبیلہ میں سے ہو۔ کیا دیکھتے ہیں کہ جریر (رض) سامنے سے نمودار ہوئے جب نبی کریم نے جریر (رض) کو دیکھا گرمجوشی سے ان کا استقبال کیا اور اپنی چادر پھیلائی پھر فرمایا : اے جریر ! اس پر بیٹھو آپ (صلی اللہ علیہ وآلہ وسلم) ان سے گفتگو میں مشغول ہوگئے جب جریر (رض) اٹھ کر چلے گئے صحابہ کرام (رض) نے عرض کیا : یا رسول اللہ ! جیسا استقبال آپ نے جریر کا کیا ہے اس طرح آپ نے کسی کا نہیں کیا : فرمایا : جی ہاں۔ میں نے یہی کیا ہے جب تمہارے پاس کسی قوم کا کوئی بڑا آدمی آئے اس کا اکرام کرو۔ (رواہ ابو سعد النقاش فی معجمہ وابن النجار)

٣٦٩٣٠۔۔۔ ” مسند جریر بن عبداللہ (رض) “ جریر (رض) کہتے ہیں : میں گھوڑوں کی پیٹھ پر جم کر نہیں بیٹھ سکتا تھا میں نے رسول اللہ (صلی اللہ علیہ وآلہ وسلم) سے اس کی شکایت کی آپ (صلی اللہ علیہ وآلہ وسلم) نے اپنا دست اقدس میرے سینے پر مارا میں نے آپ کے دست اقدس کا اثر اپنے سینے میں محسوس کیا آپ نے فرمایا : یا اللہ، اسے ثابت قدم رکھ اور اسے ہادی و مہدی بنا دے چنانچہ اس کے بعد میں گھوڑے کی پیٹھ سے نہیں گرا۔ (رواہ الطبرانی عن جریر)

٣٦٩٣١۔۔۔ جعفر بن ابی حکم (رض) کہتے ہیں : میں نے رسول کریم (صلی اللہ علیہ وآلہ وسلم) کے ساتھ تیرہ (١٣) غزوات کیے ہیں۔ (رواہ الطبرانی عن جابر)

٣٦٩٣٢۔۔۔ ” مسند جدر جان بن مالک الاسدی “ ابو بشر دولدبی، اسحاق بن ابراہیم رملی، ہاشم بن محدم بن ہاشم بن جزہ بن عبد الرحمن بن جزء بن جدرجان بن مالک اپنے آباؤ اجداد کی سند سے روایت نقل کرتے ہیں کہ جدرجان (رض) کہتے ہیں : میں اور میرا بھائی اسو رسول اللہ (صلی اللہ علیہ وآلہ وسلم) خدمت میں حاضر ہوئے ہم آپ پر ایمان لائے اور آپ کی تصدیق کی چنانچہ حضرت جزء اور حضرت جدرجان (رض) دونوں رسول اللہ (صلی اللہ علیہ وآلہ وسلم) کی خدمت کرتے تھے اور آپ کی صحبت میں بھی رہے۔ (رواہ ابن مندہ وابو نعیم وقال تفرد بہ اسحاق الرملی قال فی الاصابۃ ؛ وھم مجھولون)

٣٦٩٣٣۔۔۔ حبان بن جزی سلمی اپنے والد سے روایت نقل کرتے ہیں کہ وہ ایک قیدی کے ساتھ رسول اللہ (صلی اللہ علیہ وآلہ وسلم) کی خدمت میں حاضر ہوئے جو کہ صحابہ رسول اللہ (صلی اللہ علیہ وآلہ وسلم) میں سے تھا لوگوں نے اسے قیدی بنا لیا تھا اور وہ لوگ مشرکین تھے پھر اسلام لے آئے اور نبی کریم (صلی اللہ علیہ وآلہ وسلم) کی خدمت میں حاضر ہوئے اور وہ قیدی بھی ان کے ساتھ تھا، آپ (صلی اللہ علیہ وآلہ وسلم) نے حضرت جزی (رض) کو دو چادریں پہنائیں جزی (رض) بھی آپ کے پاس اسلام لائے اور آپ (رض) نے پھر فرمایا : عائشہ (رض) کے پاس جاؤ وہ بھی تمہیں اپنے پاس سے دو چادریں عطا کرے گی چنانچہ جزی (رض) حضرت عائشہ (رض) کے پاس گئے اور عرض کیا : اللہ تعالیٰ آپ کو خوش و خرم رکھے ! ان چادروں میں سے میرے لیے انتخاب کریں جو کہ آپ کے پاس ہیں، چونکہ نبی کریم (صلی اللہ علیہ وآلہ وسلم) نے مجھے ان میں سے دو چادریں پہنائی میں حضرت عائشہ (رض) نے اپنی مسواک طولا کھینچتے ہوئے فرمایا : یہ لے لو اور یہ لے لو۔ چنانچہ عرب کی عورتیں نہیں دیکھی جاتی تھی۔ (رواہ ابو نعیم)

٣٦٩٣٤۔۔۔ حضرت حارثہ بن نعمان (رض) کہتے ہیں : میں رسول اللہ (صلی اللہ علیہ وآلہ وسلم) کے پاس سے گزرا آپ کے پاس جبرائیل (علیہ السلام) مورچہ زن بیٹھے ہوئے تھے میں نے آپ کو سلام کیا اور آگے نکل گیا میں واپس لوٹا نبی کریم (صلی اللہ علیہ وآلہ وسلم) بھی اپنی جگہ سے اٹھ آئے فرمایا : کیا تم نے اس شخص کو دیکھا ہے جو میرے ساتھ بیٹھا ہوا تھا ؟ میں نے عرض کیا : جی ہاں، ارشاد فرمایا : وہ جبرائیل (علیہ السلام) تھے انھوں نے تمہارے سلام کا جواب دیا ہے۔ (رواہ الطبرانی وابو نعیم)

٣٦٩٣٥۔۔۔ ابن عباس (رض) کہتے ہیں : ایک مرتبہ حارثہ بن نعمان (رض) رسول اللہ (صلی اللہ علیہ وآلہ وسلم) کے پاس سے گزرے آپ کے پاس جبرائیل امین بیٹھے ہوئے تھے اور آپ (صلی اللہ علیہ وآلہ وسلم) کے ساتھ سرگوشی کر رہے تھے حارثہ (رض) آگے نکل گئے اور انھیں سلام نہ کیا جبرائیل امین نے کہا : اس شخص نے سلام کیوں نہیں کیا۔ اگر یہ سلام کرتا میں اس کے سلام کا جواب دیتا پھر کہا : یہ شخص اسی (٨٠) میں سے ہوگا رسول اللہ (صلی اللہ علیہ وآلہ وسلم) نے پوچھا : اسی سے کیا مراد ہے ؟ جواب دیا : اسی آدمیوں کے علاوہ باقی لوگ آپ کے پاس سے بھاگ جائیں گے اور یہ اسی آدمی آپ کے ساتھ صبر کیے رہیں گے ان کا اور ان کی اولاد کا رزق جنت میں ہے۔ جب حارثہ (رض) واپس لوٹے سلام کیا ان سے رسول اللہ (صلی اللہ علیہ وآلہ وسلم) نے فرمایا : جب تم ہمارے پاس سے گزرے ہمیں سلام کیوں نہیں کہا : حارثہ (رض) نے عرض کیا : میں نے آپ کے ساتھ ایک شخص بیٹھا ہوا دیکھا تھا میں نے آپ کی گفتگو کو منقطع کرنا اچھا نہیں سمجھا۔ فرمایا : کیا تم نے اس شخص کو دیکھا ہے ؟ عرض کیا جی ہاں۔ فرمایا : وہ جبرائیل امین تھے پھر آپ (رض) نے انھیں جبرائیل (علیہ السلام) کی بات سنائی۔ (رواہ الطبرانی وابو نعیم)

٣٦٩٣٦۔۔۔ حضرت علی (رض) کی روایت ہے کہ رسول کریم (صلی اللہ علیہ وآلہ وسلم) نے حضرت حمزہ (رض) بن عبد المطلب اور زید بن ثابت (رض) کے درمیان مواخات قائم کی۔ (رواہ الطبرانی)

٣٦٩٣٧۔۔۔ حضرت علی (رض) فرماتے ہیں : حمزہ بن عبد المطلب (رض) افضل الشہداء ہیں۔ رسول اللہ (صلی اللہ علیہ وآلہ وسلم) نے ارشاد فرمایا : جعفر بن ابی طالب شہیدوں کے سردار ہیں وہ فرشتوں کے ساتھ ہیں اور یہ عطیہ ان کے سوا پہلی امتوں میں کسی کو نہیں ملا، یہ ایسی چیز ہے جس سے اللہ تعالیٰ نے محمد (صلی اللہ علیہ وآلہ وسلم) کا اکرام کیا ہے۔ (رواہ ابوبکر وابو القاسم الحرفی فی امالیہ)

٣٦٩٣٨۔۔۔ ” مسند جابر بن عبداللہ (رض) “ حضرت جابر (رض) روایت نقل کرتے ہیں کہ جب نبی کریم (صلی اللہ علیہ وآلہ وسلم) نے حضرت عمر (رض) کو (شہید) دیکھا رونے لگے اور جب انھیں مثلہ دیکھا تو آپ سسکیاں لے لے کر رونے لگے۔ (رواہ الطبرانی وابو نعیم)

فائدہ :۔۔۔ مثلہ : میت کے کان ناک اور ہونٹ وغیرہ کاٹ دینے کو مثلہ کہتے ہیں : کسی کو مثلہ کرنا اسلام میں جائز نہیں۔

٣٦٩٣٩۔۔۔ حضرت حسین بن علی (رض) کی روایت ہے کہ جب رسول اللہ (صلی اللہ علیہ وآلہ وسلم) نے حضرت حمزہ (رض) کو دیکھا رونے لگے اور جب انھیں مثلہ دیکھا آپ کی سسکیاں بندھ گئیں۔ (رواہ الطبرانی)

٣٦٩٤٠۔۔۔ حضرت جابر (رض) کی روایت ہے جب غزوہ احد میں حضرت حمزہ (رض) شہید کر دئیے گئے ان کی تلاش میں حضرت صفیہ (رض) آئیں انھیں نہیں پتہ تھا کہ حضرت حمزہ (رض) کے ساتھ کیا بیتی ہے۔ صفیہ (رض) کو حضرت علی (رض) اور حضرت زبیر (رض) ملے حضرت علی (رض) نے ز بیر (رض) سے کہا : اپنی ماں کو بتادو (کہ حمزہ شہید ہوچکے ہیں) زبیر (رض) نے حضرت علی (رض) سے کہا : تم اپنی پھوپھی کو بتادو ، چنانچہ حضرت صفیہ (رض) کود ہی بول پڑیں کہ حمزہ نے کیا کیا ہے ؟ ان دونوں نے اتنا کہہ کر انھیں ٹال دیا کہ ہمیں نہیں معلوم۔ اتنے میں نبی کریم (صلی اللہ علیہ وآلہ وسلم) تشریف لائے اور فرمایا : مجھے صفیہ (رض) کی عقل ضائع ہوجانے کا خوف ہے۔ چنانچہ آپ نے اپنا دست اقدس حضرت صفیہ (رض) کے سینے پر رکھا اور ان کے لیے دعا کی۔ صفیہ (رض) نے انا للہ وانا الیہ راجعون پڑھا اور پھر رونے لگیں۔ پھر رسول اللہ (صلی اللہ علیہ وآلہ وسلم) حضرت حمزہ (رض) کی میت کے پاس تشریف لائے اور فرمایا : اگر عورتوں کے واویلے کی بات نہ ہوتی میں حمزہ کو یوں ہی پڑا رہنے دیتا تاکہ قیامت کے دن پرندوں کے پیٹوں اور جنگلی درندوں کے پیٹوں سے انھیں حشر کے لیے لے جایا جاتا۔ پھر آپ نے مقتولین (شہدا احد) پر نماز جنازہ پڑھنے کا حکم دیا چنانچہ سات میتیں لائی جاتیں اور حمزہ (رض) وہیں رکھے رہتے آپ سات تکبیریں کہتے اور یہ میتیں اٹھالی جاتیں لیکن حمزہ (رض) کو وہیں دکھ دیا جاتا پھر دوسرے سات لائے جاتے آپ ان پر بھی سات تکبیریں کہتے اور یوں فارغ ہوگئے۔ (رواہ الطبرانی)

٣٦٩٤١۔۔۔ ” مسند حباب بن ارت “ حضرت خباب (رض) کہتے ہیں : میں نے حمزہ (رض) کو (بعد از شہادت) دیکھا ہے ، ہم ان کے لیے اتنا کپڑا نہیں پاتے تھے جس میں انھیں بقدر کفایت کفن دیا جاسکے، البتہ ایک چادر تھی اسی میں ہم نے انھیں کفن دیا اس کا بھی یہ حال تھا کہ جب ہم چادر سے پاؤں ڈھاپتے سر ننگا ہوجاتا اور جب سر ڈھاپتے پاؤں ننگے ہوجاتے بہرحال ہم نے ان کا سر ڈھانپ دیا اور پاؤں پر بیری کے پتے ڈال دئیے۔ (رواہ الطبرانی)