33358 ۔۔۔ میں نے غزوہ احد کے دن اپنے آپ کو اس حالت میں دیکھا کہ روئے زمین میں میرے قریب کوئی نہیں تھا سوائے جبرائیل کے کہ وہ میرے دائیں طرف تھے اور طلحہ میری بائیں جانب تھے۔ (حاکم نے ابوہریرة سے نقل کیا ہے)

33359 ۔۔۔ طلحہ ان لوگوں میں سے ہے جس نے اپنے مقصد کو پالیا۔ (ترمذی اور ابن ماجہ نے معاویہ سے اور ابن عساکر نے عائشہ (رض) سے نقل کیا ہے)

33360 ۔۔۔ فرمایا طلحہ نے اپنے لیے جنت واجب کرالی جب احد میں رسول اللہ (صلی اللہ علیہ وآلہ وسلم) کے ساتھ فدائیت کا معاملہ کرتے ہوئے قربانی دی۔ (احمد ترمذی ابن حبان ، مستدرک بروایت ابن الزبیر)

33361 ۔۔۔ اے طلحہ کل (قیامت کے دن ) تیری جنت میرے ذمے ہے۔ (ابونعیم نے فضائل الصحابہ میں عمر سے روایت کیا ہے)

33362 ۔۔۔ یہ ان لوگوں میں سے ہے جنہوں نے اپنا مقصد پالیا یعنی طلحہ۔ (ترمذی نے طلحہ سے نقل کیا ہے)

33363 ۔۔۔ اگر تو بسم اللہ کہتا تو تجھ کو فرشتے اٹھالیتے اور لوگ تجھ کود یکھ رہے ہوتے یہاں تک وہ تم کو لے کر آسمان کی فضاء میں داخل ہوجاتے ۔ (ترمذی اور حاکم نے جابر سے روایت کیا ہے)

33364 ۔۔۔ طلحہ اور زبیر دونوں جنت میں پڑوسی ہوں گے۔ (ترمذی اور حاکم نے علی سے نقل کیا ہے۔ ذخیرة الحفاظ 3468 ضعیف الترمذی 782)

33365 ۔۔۔ جو شخص یہ پسند کرتا ہے کہ وہ زمین پر چلتا پھر تا شہید دیکھے اس کو چاہیے کہ وہ طلحہ بن عبید اللہ کو دیکھ لے۔ (ترمذی اور حاکم نے جابر سے نقل کیا ہے)

33366 ۔۔۔ اے طلحہ توسخی ہی ہے۔ (ابن عساکر نے محمد بن ابراہیم بن حارث التیمی سے نکل کیا ہے)

33367 ۔۔۔ جو شخص اس زمین پر شہید کو دیکھنا چاہتا ہے وہ طلحہ بن عبید اللہ کو دیکھ لے۔ (حاکم تعقب اور ابن عساکر نے جابر سے روایت کیا ہے)

33368 ۔۔۔ جس شخص کو اس بات میں خوشی ہو کہ وہ زمین پر ایک شخص کو دیکھے جو اپنے مقصد میں کامیاب ہوگیا ہے تو وہ طلحہ کو دیکھ نے۔ (ابویعلی حلیة الاولیا اور ابن عساکر نے عائشہ (رض) سے نقل کیا ہے)

33369 ۔۔۔ اے طلحہ ! یہ جبرائیل تھے تجھے سلام دے رہے تھے اور تیرے بارے میں کہہ رہے تھے کہ میں قیامت کی ہول ناکیوں میں تیرے ساتھ ہوں گا یہاں تک کہ میں تجھ کو اس کی سختیوں سے بچالوں گا۔ (ابوبکر الشافعی نے الغیلانیات میں اور الدیلمی اور ابن عساکر نے عمر سے نقل کیا ہے)

33370 ۔۔۔ اے طلحہ تو ان لوگوں میں سے ہے جو اپنے مقصد میں کامیاب ہوگئے۔ (ابن مندہ اور ابن عساکر نے اسماء بنت ابوبکر اور ابن عساکر نے عائشہ (رض) سے نقل کیا ہے ) ۔

33371 ۔۔۔ اے طلحہ اگر تو بسم اللہ کہتا تو دنیا ہی میں اپنے اس گھر کو دیکھ لیتا جو اللہ تعالیٰ نے تیرے لیے جنت میں بنایا ہے۔ (الدار قطنی نے الافراد میں اور ابن شاہین نے اپنی امالی میں اور ابونعیم نے فضائل الصحابہ میں اور ابن عساکر نے طلحہ (رض) سے روایت کیا کہ رسول اللہ (صلی اللہ علیہ وآلہ وسلم) کی طرف مدافعت کرتے ہوئے ان کا ہاتھ شل ہوگیا تو انھوں نے کہا جس یعنی غفلت سے ایسا ہو تو آپ (صلی اللہ علیہ وآلہ وسلم) نے مذکورہ بالا ارشاد فرمایا) ۔

33372 ۔۔۔ حضرت طلحہ (رض) نے کہا کہ جب رسول اللہ (صلی اللہ علیہ وآلہ وسلم) مجھے دیکھتے تو فرماتے کہ دنیا و آخرت میں سبقت کرنے والے ہیں۔ (طبرانی اور سعید بن منصور نے طلحہ (رض) سے نقل کیا)

33373 ۔۔۔ غزوہ احد کے دن میرے ساتھ سوائے طلحہ کوئی نہیں رکا بیشک وہ مجھ کو تیروں سے اپنی ہتھیلیوں کے ذریعے بچا رہے تھے ۔ (الدیلمی نے جابر سے نقل کیا ہے)

33374 ۔۔۔ اے اللہ طلحہ سے اس حال میں ملئے کہ وہ آپ کو دیکھ کر ہنس رہا ہو اور آپ اس کی طرف دیکھ کر ہنس رہے ہوں ۔ (الباوری بغوی طبرانی نے معجم کبیر میں ابونعیم اور ضیا مقدسی نے حصین ابن وحوح یعنی طلحہ بن انبراء سے روایت کیا ہے) ۔

33375 ۔۔۔ لشکر میں ابوطلحہ کی آواز ایک جماعت سے زیادہ بہتر ہے۔ (احمد بن حنبل اور حاکم انس سے روایت کیا ہے)

33376 ۔۔۔ لشکر میں ابوطلحہ کی آواز ایک ہزار آدمی سے بہتر ہے۔ (سمویہ نے انس سے روایت کیا ہے)

33377 ۔۔۔ لشکر میں ابوطلحہ کی آواز ایک ہزار آدمی سے بہتر ہے۔ (حاکم نے جابر سے روایت کیا ہے)