22177 ۔۔۔ شعبی کہتے ہیں میں نے سیدنا حضرت علی المرتضی (رض) کو دیکھا ہے اور ان کے پیچھے نماز پڑھی ہے چنانچہ آپ (رض) ” بسم اللہ الرحمن الرحیم “ کو پڑھتے تھے ۔ (رواہ بیہقی)

22178 ۔۔۔ حضرت جابر (رض) کی روایت ہے کہ حضور اکرم (صلی اللہ علیہ وآلہ وسلم) نے مجھ سے پوچھا : تم نماز کو کیسے شروع کرتے ہو اے جابر ؟ میں نے عرض کیا : میں ” الحمد للہ رب العالمین “ سے نماز شروع کرتا ہوں مجھے حکم دیا : ” بسم اللہ الرحمن الرحیم “ بھی پڑھا کر۔ (رواہ ابن نجار)

22179 ۔۔۔ موسیٰ بن ابی حبیب ، حکم بن عمیر (رض) جو کہ بدری صحابی ہیں سے روایت کرتے ہیں کہ میں نے حضور اکرم (صلی اللہ علیہ وآلہ وسلم) کے پیچھے نماز پڑھی آپ (صلی اللہ علیہ وآلہ وسلم) رات کی نماز میں صبح کی نماز میں اور جمعہ کی نماز میں ” بسم اللہ الرحمن الرحیم “ کو جہرا پڑھتے تھے ۔ کلام : ۔۔۔ یہ حدیث ضعاف دار قطنی میں ہے 242 ۔

22180 ۔۔۔ عمرو بن دینار کی روایت ہے کہ حضرت عبداللہ ابن عباس (رض) اور حضرت عبداللہ ابن عمرو (رض) دونوں ” بسم اللہ الرحمن الرحیم “ سے نماز شروع کرتے تھے۔ (رواہ عبدالرزاق)

22181 ۔۔۔ حضرت عبداللہ ابن عباس (رض) کہتے ہیں کہ ” بسم اللہ الرحمن الرحیم “ کو جہرا پڑھنا دیہاتیوں کی قرات ہے۔ (رواہ عبدالرزاق)

22182 ۔۔۔ عبداللہ بن ابی بکر بن حفص بن عمر بن سعد کی روایت ہے کہ حضرت معاویہ (رض) نے مدینہ میں لوگوں کو عشاء کی نماز پڑھائی چنانچہ انھوں نے ” بسم اللہ الرحمن الرحیم “ اور بعض تکبیریں نہ کہیں جب نماز سے فارغ ہوئے تو ان کی قرات کو سننے والے بعض مہاجرین و انصار نے پکار کر کہا : اے معاویہ ! کیا آپ نے نماز میں سے چوری کی یا آپ بھول گئے ہیں ” بسم اللہ الرحمن الرحیم “ اور سجدہ میں جاتے وقت کی تکبیر کیا ہے ؟ چنانچہ حضرت معاویہ (رض) نے اس کے بعد ایسا نہیں کیا ۔ (رواہ عبدالرزاق)

22183 ۔۔۔ حضرت عبداللہ ابن عباس (رض) کی روایت ہے کہ ایک مرتبہ رسول اللہ (صلی اللہ علیہ وآلہ وسلم) نے نماز پڑھی اور ” بسم اللہ الرحمن الرحیم “ کو جہرا پڑھا۔ (رواہ ابن عساکر)

22184 ۔۔۔ نافع کی روایت ہے کہ ابن عمر (رض) ” بسم اللہ الرحمن الرحیم “ کو نہیں چھوڑتے تھے چنانچہ آپ (رض) قرات کو ” بسم اللہ الرحمن الرحیم “ سے شروع کرتے تھے ۔ (رواہ عبدالرزاق)

22185 ۔۔۔ حضرت عبداللہ ابن عمرو (رض) کی روایت ہے کہ عمر (رض) قرات ” بسم اللہ الرحمن الرحیم “ سے شروع کرتے تھے ۔ (رواہ ابن نجار) کلام : ۔۔۔ ذخیرۃ الحفاظ میں یہ حدیث قدرے تغیر الفاظ کے ساتھ آئی ہے چنانچہ اس میں قراءت کی بجائے صلوۃ کا لفظ ہے دیکھے (6180)

22186 ۔۔۔ قیس بن عباد کہتے ہیں ابن عبداللہ بن مغفل اپنے والد سے روایت کرتے ہیں کہ میں نے نبی کریم (صلی اللہ علیہ وآلہ وسلم) کے صحابہ کرام (رض) میں سے بدعت کے خلاف اپنے والد سے بڑھ کر کسی کو نہیں پایا۔ چنانچہ انھوں نے مجھے ایک مرتبہ بسم اللہ الرحمن الرحیم (جہرا) پڑھتے ہوئے سنا تو کہا : اے بیٹے ! بدعت سے بچو میں نے نبی کریم (صلی اللہ علیہ وآلہ وسلم) ابوبکر عمر اور عثمان (رض) کے پیچھے نماز پڑھی ہے میں نے اس سے کسی کو بھی یوں بسم اللہ پڑھتے ہوئے نہیں سنا جب تم قرات کرنا چاہو تو الحمدللہ رب العالمین سے کیا کرو ۔ (عبدالرزاق ابن ابی شیبہ)

22187 ۔۔۔ حضرت ابن عباس (رض) کی روایت ہے کہ ان سے کسی نے پوچھا : کیا نبی (صلی اللہ علیہ وآلہ وسلم) ظہر اور عصر کی نماز میں قرات کرتے تھے ؟ ابن عباس (رض) نے جواب دیا نہیں وہ آدمی بولا : عین ممکن ہے کہ آپ (صلی اللہ علیہ وآلہ وسلم) دل دل میں آہستہ قرات کرتے ہوں ۔ فرمایا یہ پہلی صورت سے زیادہ باعث شر ہے چنانچہ رسول (صلی اللہ علیہ وآلہ وسلم) اللہ تبارک وتعالیٰ کے مامور بندے تھے انھیں جو پیغام دیا جاتا وہ وہ ٹھیک ٹھیک ہم تک پہچاتے تھے نیز آپ (صلی اللہ علیہ وآلہ وسلم) نے لوگوں کے سوا ہمیں کسی چیز میں خصوصیت نہیں بخشی بجز تین چیزوں کہ وہ کہ ہمیں حکم دیا ہے کہ ہم اچھی طرح سے وضو کریں اور یہ کہ ہم صدقہ نہ کھائیں اور یہ کہ ہم گدھے کو گھوڑی پر جفتی کے لیے نہ کدوائیں (رواہ ابن جریر) فائدہ :۔۔۔ گدھے کو گھوڑی پر کدوانے کا مطلب یہ ہے کہ جب ان دو مختلف الاجناس جانوروں سے جفتی کروائی جائے تو ان سے ایک تیسری مخلوط جنس یعنی خچر پیدا ہوتی ہے اور حدیث میں بھی خچر کی نسل بڑھانے سے منع کیا گیا ہے۔ علامہ خطابی کہتے ہیں جب گدھے کو گھوڑی پر کدوایا جائے گا تو تیسری نسل ان سے پیدا ہوگی اور یوں گھوڑوں کی نسل کے منقطع ہونے کا خدشہ ہے اور گھوڑوں کے منافع ختم ہوجائیں گے چونکہ گھوڑے سواری ، باربرداری ، جہاد ، مال غنیمت کے جمع کرنے کے کام آتے ہیں حالانکہ خچر میں یہ سارے منافع نہیں پائے جاتے اسی طرح شوافع کے نزدیک گھوڑوں کا گوشت بھی کھایا جاتا ہے جب کہ خچر کا گوشت بالاتفاق حرام ہے (اتنی النھایہ 445) جب کہ بعض دوسری احادیث میں گدھے کو گھوڑی پر کدوانے کی اجازت آتی ہے اور اسی طرح بعض کتب فقہ میں اس امر کو مباح کہا گیا ہے حالانکہ اس حدیث میں ممانعت آئی ہے۔ واللہ اعلم ! اس شبہ کا ازالہ یوں کیا جاسکتا ہے کہ پوری شدومد کے ساتھ کلی طور پر رواج نہ پھیلا دیا جائے البتہ کبھی کبھار گدھے کو گھوڑی پر کدوانے کی اجازت ہے تاکہ کہ گھوڑوں کی نسل بھی منقطع نہ ہو اور خچر بھی ناپید نہ ہوں ۔ واللہ اعلم بالصواب ۔

22188 ۔۔۔ حضرت علی (رض) کہتے ہیں کہ نبی کریم (صلی اللہ علیہ وآلہ وسلم) جب ” ولاالضالین “ کہتے تو اس کے بعد ” آمین “ کہتے اور اونچی آواز سے کہتے ۔ (ابن ماجہ ابن جریر) ابن جریر نے اس حدیث کو صحیح قرار دیا ہے۔ (وابن شاھین)

22189 ۔۔۔ حضرت بلال بن ابی رباح (رض) کی روایت ہے کہ نبی کریم (صلی اللہ علیہ وآلہ وسلم) نے ان سے فرمایا کہ مجھ سے پہلے آمین نہ کہہ دیا کرو ۔ (ابو شیخ)

22190 ۔۔۔ حضرت وائل (رض) کی روایت ہے کہ میں نبی کریم (صلی اللہ علیہ وآلہ وسلم) کے پیچھے نماز پڑھی جب آپ (صلی اللہ علیہ وآلہ وسلم) نے فاتحہ الکتاب پڑھی تو باواز بلند آمین کہا اور پھر دائیں بائیں سلام پھیرا حتی کہ میں نے آپ (صلی اللہ علیہ وآلہ وسلم) کے رخساروں کی سفیدی دیکھ لی (ابن ابی شیبہ)

22191 ۔۔۔ اسی طرح وائلہ (رض) کی حدیث ہے کہ رسول (صلی اللہ علیہ وآلہ وسلم) جب غیر المغضوب علیھم ولا الضالین کہتے تو ہمیں سنانے کے لیے آمین کہتے ۔ (رواہ عبدالرزاق)

22192 ۔۔۔ وائل بن حجر (رض) کہتے ہیں میں نے نبی کریم (صلی اللہ علیہ وآلہ وسلم) کے ساتھ نماز پڑھی چنانچہ جب آپ (صلی اللہ علیہ وآلہ وسلم) نے ولا الضالین کہا تو اس کے بعد ” آمین “ کہا اور آواز کو لمبا کیا ۔ (رواہ ابن ابی شیبہ) ۔

22193 ۔۔۔ ابو عثمان کی روایت ہے کہ بلال (رض) سے نبی کریم (صلی اللہ علیہ وآلہ وسلم) فرمایا کرتے تھے کہ مجھ سے پہلے آمین مت کہا کرو ّسعید بن منصور)

22194 ۔۔۔ حضرت ابوہریرہ (رض) کہتے ہیں کہ جب اہل زمین کی آمین کے ساتھ موافق ہوجاتی ہے تو بندے کے اگلے پچھلے گناہ سب معاف کردیئے جاتے ہیں (رواہ عبدالرزاق)

22195 ۔۔۔ ابن سیرین (رح) کی روایت ہے کہ حضرت ابوہریرہ (رض) بحرین میں مؤذن تھے چنانچہ انھوں نے امام پر شرط لگا رکھی تھی کہ وہ ان پر آمین کہنے میں سبقت نہ لے جائے (سعید بن منصور)

22196 ۔۔۔ نافع کی روایت ہے کہ ابن عمر (رض) جب سورت فاتحہ ختم کرتے تو آمین کہتے چنانچہ آپ (رض) سورت فاتحہ کے اختتام پر آمین کہنا نہیں چھوڑتے تھے اور مقتدیوں کو بھی آمین کہنے پر ابھارتے تھے نیز میں اس بارے میں ان سے ایک حدیث بھی سن رکھی ہے۔ (رواہ عبدالرزاق)