22359 ۔۔۔ ” مسند صدیق (رض) “ سیدنا حضرت ابوبکر صدیق (رض) فرماتے ہیں کہ میں نے رسول اللہ (صلی اللہ علیہ وآلہ وسلم) سے عرض کیا کہ مجھے کوئی دعا سکھلا دیجئے جسے میں اپنی نماز میں پڑھا کروں آپ (صلی اللہ علیہ وآلہ وسلم) نے کہو : ” اللہم انی ظلمت نفسی ظلما کثیرا ولا یغفر الذنوب الا انت فاغفرلی مغفرۃ من عندک وارحمنی انک انت الغفور الرحیم “۔ یا اللہ میں نے اپنی جان پر بہت ظلم کیا ہے اور تیرے سوا کوئی بھی گناہوں کو معاف نہیں کرتا پس میری مغفرت کر دے اور اپنے پاس سے مجھے مغفرت عطا فرما اور مجھ پر رحم کر بلاشبہ تو ہی مغفرت کرنے والا اور رحم کرنے والا ہے۔ (ابن ابی شیبہ ، احمد بن حنبل ، بخاری ، مسلم ، ترمذی ، نسائی ، ابن ماجہ ، وابن حذیمہ ، وابو عوانہ ، ابن حبان ودارقطنی فی الافراد و بیہقی)

22360 ۔۔۔ روایت ہے کہ حضرت عبداللہ ابن عباس (رض) تشہد میں یہ دعا پڑھتے تھے ۔ ” اللہم تقبل شفاعۃ محمد الکبری وارفع درجتہ العلیا واتہ سؤلہ فی الاخرۃ والاولی کما اتیت ابراھیم وموسی و عیسی “۔ یا اللہ محمد (صلی اللہ علیہ وآلہ وسلم) کی شفاعت کبری کو قبول فرما ، اور ان کے درجات بلند فرما اور دنیاوآخرت میں ان کا مقصود انھیں عطا فرما جس طرح کہ تو نے ابراہیم وموسی اور عیسیٰ علیہم الصلوۃ والسلام کو عطا کیا تھا ۔

22361 ۔۔۔ حضرت عبداللہ ابن مسعود (رض) فرماتے ہیں کہ جب تم نماز پڑھو تو حضور اکرم (صلی اللہ علیہ وآلہ وسلم) پر اچھی طرح سے درود بھیجا کرو ۔ (رواہ عبدالرزاق)

22362 ۔۔۔ ابن تمیمی کہتے ہیں کہ ایک مرتبہ حضرت عبداللہ ابن عباس (رض) سے نماز میں انگلی کو حرکت دینے کے متعلق پوچھا گیا تو آپ (رض) نے فرمایا : یہ اخلاص ہے۔ (رواہ عبدالرزاق)

22363 ۔۔۔ حضرت عبداللہ ابن عمرو (رض) کی روایت ہے کہ رسول اللہ (صلی اللہ علیہ وآلہ وسلم) نے ارشاد فرمایا کہ نماز میں شہادت کی انگلی سے اشارہ کرنا شیطان پر تلوار کے وار سے بھی زیادہ گراں گذرتا ہے۔ (رواہ ابن نجار)

22364 ۔۔۔ عبدالرحمن بن ابزی (رض) کی روایت ہے کہ حضور اکرم (صلی اللہ علیہ وآلہ وسلم) نماز میں اپنی شہادت کی انگلی سے یوں اشارہ کرتے تھے ۔ عبدالرحمن بن ابزی (رض) نے اپنی انگلی سے اشارہ کرکے بتایا ۔ (رواہ عبدالرزاق)

22365 ۔۔۔ ابو مروان اسلمی (رض) کہتے ہیں کہ میں نے سیدنا حضرت عمر ابن خطاب (رض) ، سیدنا حضرت علی المرتضی (رض) اور حضرت ابو ذر (رض) کے پیچھے نماز پڑھی ہے میں نے ان سب حضرت کو دیکھا ہے کہ یہ اپنے دائیں بائیں سلام پھیرتے تھے ۔ (الحارث)

22366 ۔۔۔ ” مسند سائب بن یزید “۔ حضرت سائب بن یزید (رض) کی روایت ہے کہ نبی کریم (صلی اللہ علیہ وآلہ وسلم) نے ہمیں حکم کیا ہے کہ ہم ایک نماز سے دوسری نماز میں اس وقت تک نہ جائیں جب تک کہ ہم کلام کرلیں یا پہلی نماز سے خروج نہ کرلیں ۔ (ابن عساکر)

22367 ۔۔۔ زہری کی روایت ہے کہ حضرت عبداللہ بن عمر یا ابن عمر (رض) فرماتے ہیں کہ دو نمازوں کے درمیان فرق کرنے والی چیز سلام کا پھیرنا ہے۔ (رواہ عبدالرزاق)

22368 ۔۔۔ سیدنا حضرت علی المرتضی (رض) فرماتے ہیں کہ جب رکوع و سجدہ مکمل ہوجائیں اور ان کے بعد نمازی کو کوئی حدث لاحق ہوجائے تو اس کی نماز مکمل ہوجاتی ہے۔ فائدہ :۔۔۔ یہی مذہب امام اعظم ابوحنیفہ (رح) کا ہے کہ جب رکوع و سجدہ کے بعد تشہد میں بقدر واجب بیٹھنے کے بعد عمدا نمازی کو حدث لاحق ہوا تو اس کی نماز مکمل ہوگئی ۔

22369 ۔۔۔ سیدنا حضرت علی المرتضی (رض) فرماتے ہیں کہ نماز کو آخری سجدہ سے سر اٹھانے کے بعد حدث لاحق ہوجائے تو اس کی نماز ہوچکی ۔ (رواہ ابن جریر)

22370 ۔۔۔ عاصم بن ضمرہ (رض) روایت کرتے ہیں کہ سیدنا حضرت علی المرتضی (رض) نے فرمایا کہ نماز جب تشہد کی مقدار بیٹھ چکے اور اس کے بعد اسے حدث لاحق ہوجائے تو اس کی نماز مکمل ہوجاتی ہے۔ (رواہ عبدالرزاق ، و بیہقی) کلام : ۔۔۔ بیہقی (رح) کہتے ہیں : عاصم لیس بالقوی یعنی عاصم کوئی پختہ راوی نہیں ہیں۔

22371 ۔۔۔ ” مسند صدیق (رض) “ مسروق (رض) روایت کرتے ہیں سیدنا حضرت ابوبکر صدیق (رض) دائیں اور بائیں ” السلام علیکم و رحمۃ اللہ “۔ کہتے ہوئے سلام پھیرتے اور فورا اٹھ جاتے گویا کہ آپ (رض) گرم پتھروں پر بیٹھے ہیں۔ (رواہ عبدالرزاق، وابن سعد وطحاوی)

22372 ۔۔۔ طاوؤس (رح) کہتے ہیں کہ سیدنا حضرت عمر ابن خطاب (رض) نے بلند آواز سے سلام پھیرا ہے۔ (رواہ عبدالرزاق)

22373 ۔۔۔ عطاء کہتے ہیں کہ سب سے پہلے سیدنا حضرت عمر ابن خطاب (رض) نے بلند آواز سے سلام پھیرا ہے ورنہ آپ (رض) سے پہلے صحابہ کرام رضوان اللہ تعالیٰ عنہم اجمعین دل ہی دل میں سلام پھیر لیتے تھے حتی کہ سیدنا حضرت عمر ابن خطاب (رض) نے بآواز بلند سلام پھیرنا شروع کیا۔ (رواہ عبدالرزاق)

22374 ۔۔۔ ابن طاوؤس کی روایت ہے کہ حضرت عمر (رض) نے سب سے پہلے جہرا نماز میں سلام پھیرا ہے چنانچہ انصار نے آپ (صلی اللہ علیہ وآلہ وسلم) پر عیب لگایا اور کہا : آپ ایسا کیوں کرتے ہیں ؟ آپ (رض) نے فرمایا میں چاہتا ہوں کہ میری طرف سے ایک اعلان ہوجائے ۔ (رواہ عبدالرزاق)

22375 ۔۔۔ حضرت براء بن عازب (رض) کی روایت ہے کہ حضور اکرم (صلی اللہ علیہ وآلہ وسلم) ” السلام علیکم و رحمۃ اللہ “۔ کہتے ہوئے دائیں بائیں سلام پھیرتے حتی کہ ہم آپ (صلی اللہ علیہ وآلہ وسلم) کے رخسار مبارک کی سفیدی دیکھ لیتے ۔

22376 ۔۔۔ ” مسند سہل بن سعد ساعدی عبد المہیمن بن عباس بن سہل بن سعد اپنے والد کے واسطہ سے دادا کی روایت نقل کرتے ہیں کہ رسول اللہ (صلی اللہ علیہ وآلہ وسلم) ایک سلام پھیرتے اور دائیں جانب چہرہ مبارک کو مائل کردیتے درآں حالیکہ آپ امامت کرا رہے ہوتے تھے ۔ (رواہ ابن نجار)

22377 ۔۔۔ روایت ہے کہ نافع (رح) سے دریافت کیا گیا کہ حضرت عبداللہ ابن عمرو (رض) کیسے سلام پھیرتے تھے ؟ انھوں نے جواب دیا کہ آپ (رض) ایک مرتبہ دائیں جانب سلام پھیرتے ہوئے کہتے ” السلام علیکم “ ۔ (رواہ عبدالرزاق)

22378 ۔۔۔ حضرت عبداللہ ابن مسعود (رض) فرماتے ہیں نہیں بھولا ہوں کہ رسول اللہ دائیں جانب سلام پھیرتے ہوئے کہتے ” السلام علیکم و رحمۃ اللہ “ حتی کہ ہم آپ (صلی اللہ علیہ وآلہ وسلم) کے رخسار مبارک کی سفیدی دیکھ لیتے اور پھر بائیں جانب ” السلام علیکم و رحمۃ اللہ وبرکاتہ “۔ کہتے ہوئے سلام پھیرتے حتی کہ ہم آپ (صلی اللہ علیہ وآلہ وسلم) کے رخسار مبارک کی سفیدی دیکھ لیتے ۔ (رواہ عبدالرزاق)