22899 ۔۔۔ مسور بن یزید کاہلی (رض) کہتے ہیں ایک دفعہ میں صبح کی نماز میں حضور اکرم (صلی اللہ علیہ وآلہ وسلم) کے ساتھ حاضر ہوا آپ (صلی اللہ علیہ وآلہ وسلم) ایک آیت پر رک گئے جب نماز سے فارغ ہوئے تو فرمایا : اے ابی تم نے مجھے فتحہ (لقمہ) کیوں نہیں دیا ۔ (رواہ ابن عساکر)

22900 ۔۔۔ مسور بن یزید اسدی (رض) کہتے ہیں : ایک مرتبہ حضور اکرم (صلی اللہ علیہ وآلہ وسلم) نے نماز پڑھی اور کچھ آیتیں چھوڑ دیں (جب نماز سے فارغ ہوئے تو) ایک آدمی اٹھا اور کہنے لگا : یا رسول اللہ (صلی اللہ علیہ وآلہ وسلم) آپ نے فلاں فلاں آیتیں چھوڑ دی ہیں ، حکم ہوا تم نے مجھے (نماز ہی میں) کیوں نہیں یاد کرائیں ۔ (رواہ عبداللہ بن احمد وابن عساکر)

22901 ۔۔۔ ” مسند ربیعہ بن کعب اسلمی (رض) “۔ کہتے ہیں : ایک مرتبہ میں حضرت میمونہ (رض) کے گھر پر تھا حضور اکرم (صلی اللہ علیہ وآلہ وسلم) رات کو اٹھے اور نماز پڑھنے لگے میں بھی اٹھ کر آپ (صلی اللہ علیہ وآلہ وسلم) کی بائیں طرف جا کھڑا ہوا آپ (صلی اللہ علیہ وآلہ وسلم) نے مجھے ہاتھ سے پکڑ کر اپنی دائیں طرف کرلیا ، پھر آپ (صلی اللہ علیہ وآلہ وسلم) نے تیرا رکعتیں پڑھیں اور ہر رکعت میں سورت ” یا ایھا المزمل “۔ پڑھنے کے بقدر قیام لیا ۔ (رواہ عبدالرزاق، حضرت عبداللہ ابن عباس (رض))

22902 ۔۔۔ ” مسند حضرت عبداللہ ابن عباس (رض) “ حضرت عبداللہ ابن عباس (رض) کہتے ہیں : ایک رات میں نے (اپنی خالہ) حضرت میمونہ بنت حارث (رض) کے ہاں رات بسر کی چنانچہ حضور اکرم (صلی اللہ علیہ وآلہ وسلم) رات کو نماز پڑھنے کے لیے کھڑے ہوئے ہیں بھی آپ کی دائیں طرف جا کھڑا ہوا آپ (صلی اللہ علیہ وآلہ وسلم) نے مجھے کنپٹی کے بالوں سے پکڑ کر دائیں طرف کرلیا ۔ (رواہ ابن ابی شیبۃ)

22903 ۔۔۔ حضرت عبداللہ ابن عباس (رض) کہتے ہیں ایک مرتبہ میں نے رات کو حضرت میمونہ (رض) کے ہاں قیام کیا چنانچہ رات کو حضور اکرم (صلی اللہ علیہ وآلہ وسلم) اٹھے اور نماز پڑھنے لگے میں بھی آپ کی بائیں طرف جا کھڑا ہوا آپ (صلی اللہ علیہ وآلہ وسلم) نے مجھے ہاتھ سے پکڑ کر اپنی دائیں طرف کرلیا پھر آپ (صلی اللہ علیہ وآلہ وسلم) نے تیرا رکعتیں پڑھیں میں نے اندازہ کیا کہ ہر رکعت میں قیام آپ (صلی اللہ علیہ وآلہ وسلم) نے سورت ” یا ایھا المزمل “ پڑھ لینے کے بقدر کیا (حضرت عبداللہ ابن عباس (رض)) فرماتے ہیں : ایک رات میں نے اپنی خالہ میمونہ (رض) کے ہاں بسر کی شام ہوجانے کے بعد حضور اکرم (صلی اللہ علیہ وآلہ وسلم) تشریف لائے اور فرمایا : کیا اس لڑکے نے نماز پڑھی ہے ؟ اہل خانہ نے جواب دیا : جی ہاں آپ (صلی اللہ علیہ وآلہ وسلم) سو گئے حتی کہ رات کا کچھ حصہ گزر گیا پھر آپ (صلی اللہ علیہ وآلہ وسلم) اٹھے اور وضو کیا میں بھی اٹھا اور آپ کے بچے ہوئے پانی سے وضو کیا پھر اپنا ازار لپیٹا اور آپ (صلی اللہ علیہ وآلہ وسلم) کی بائیں طرف (نماز پڑھنے) جا کھڑا ہوا آپ (صلی اللہ علیہ وآلہ وسلم) نے مجھے کان یا سر سے پکڑ کر گھمایا اور اپنی دائیں طرف کھڑا کردیا پھر آپ (صلی اللہ علیہ وآلہ وسلم) نے پانچ یا سات رکعت وتر پڑھے اور ان کے آخر میں سلام پھیرا ۔ (رواہ ابن جریر)

22904: حضرت سعید بن جبیر (رض) کی روایت ہے کہ ابن عباس (رض) فرماتے ہیں : ایک رات میں نے اپنی خالہ میمونہ (رض) کے ہاں بسر کی شام ہوجانے کے بعد نبی کریم (صلی اللہ علیہ وآلہ وسلم) تشریف لائے اور فرمایا : کیا اس لڑکے نے نماز پڑھی ہے ؟ اہل خانہ نے جواب دیا : جی ہاں آپ سو گئے حتی کہ رات کا کچھ حصہ گزر گیا پھر آپ (صلی اللہ علیہ وآلہ وسلم) اٹھے اور وضو کیا میں بھی اٹھا اور آپ کے بچے ہوئے پانی سے وضو کیا پھر اپنا ازار لپیٹا اور آپ (صلی اللہ علیہ وآلہ وسلم) کی بائیں طرف (نماز پڑھنے) جا کھڑا ہوا آپ (صلی اللہ علیہ وآلہ وسلم) نے مجھے کان یا سر سے پکڑ کر گھمایا اور اپنی دائیں طرف کھڑا کردیا پھر آپ نے پانچ یا سات رکعت وتر پڑھے اور ان کے آخر میں سلام پھیرا۔ رواہ ابن جریر

22905 ۔۔۔ حضرت عبداللہ ابن عباس (رض) کی روایت ہے کہ مجھے والد نے حضور اکرم (صلی اللہ علیہ وآلہ وسلم) کے پاس ایک کام کے لیے بھیجا ، میں نے آپ (صلی اللہ علیہ وآلہ وسلم) کو اپنے صحابہ کرام رضوان اللہ تعالیٰ عنہم اجمعین کے ساتھ مسجد میں بیٹھے ہوئے پایا مجھے آپ (صلی اللہ علیہ وآلہ وسلم) سے بات کرنے کی جرات نہ ہوسکی ، چنانچہ آپ (صلی اللہ علیہ وآلہ وسلم) گھر سے اٹھتے ، نماز پڑھتے اور مسجد سے گھر واپس آجاتے چنانچہ (رات کو) آپ (صلی اللہ علیہ وآلہ وسلم) گھر میں داخل ہوئے پھر وضو کیا اور میں نے بھی وضو کیا پھر آپ (صلی اللہ علیہ وآلہ وسلم) نماز میں مشغول ہوگئے میں بھی آپ (صلی اللہ علیہ وآلہ وسلم) کی بائیں طرف جا کھڑا ہوا آپ (صلی اللہ علیہ وآلہ وسلم) نے مجھے پکڑ کر گھمایا اور اپنی دائیں طرف کھڑا کردیا اور نماز پڑھی پھر فجر کی دو رکعتیں پڑھیں اور پھر نماز کے لیے مسجد کی طرف تشریف لے گئے ۔ (رواہ الدارقطنی فی الافراد وابن عساکر)

22906 ۔۔۔ حضرت عبداللہ ابن عباس (رض) فرماتے ہیں : صفوں کی دائیں طرف کھڑے ہوا کرو اور ستونوں کے درمیان کھڑا ہونے سے بچو اور پہلی صف کو اپنے اوپر لازم کرلو ۔ (رواہ عبدالرزاق)

22907 ۔۔۔ حضرت انس بن مالک (رض) کہتے ہیں ایک مرتبہ حضور اکرم (صلی اللہ علیہ وآلہ وسلم) نے نماز میں اپنی دائیں طرف مجھے کھڑا کیا ۔ (رواہ ابن عساکر)

22908 ۔۔۔ حضرت انس بن مالک (رض) کہتے ہیں : ایک مرتب میں نبی کریم (صلی اللہ علیہ وآلہ وسلم) کی خدمت میں حاضر ہوا آپ (صلی اللہ علیہ وآلہ وسلم) نماز پڑھ رہے تھے آپ (صلی اللہ علیہ وآلہ وسلم) نے مجھے اپنی دائیں طرف کھڑا کردیا ۔ (رواہ ابن ابی شیبۃ)

22909 ۔۔۔ نیز نبی کریم (صلی اللہ علیہ وآلہ وسلم) نے ان کو اور اہل خانہ کی ایک عورت کو نماز پڑھائی تو آدمیوں کو اپنی دائیں طرف اور عورت کو پیچھے کھڑا کیا۔ ابن ابی شیبہ

22910: حضرت انس (رض) کی روایت ہے کہ ایک مرتبہ نبی کریم (صلی اللہ علیہ وآلہ وسلم) گھوڑے سے گرگئے اور آپ (صلی اللہ علیہ وآلہ وسلم) کے دائیں پہلو پر چوٹ آئی ہم عیادت کے لیے آپ کی خدمت میں حاضر ہوئے اتنے میں نماز کا وقت ہوگیا چنانچہ آپ (صلی اللہ علیہ وآلہ وسلم) نے ہمیں بیٹھ کر نماز پڑھائی جب کہ ہم نے کھڑے ہو کر آپ کے پیچھے نماز پڑھی جب نماز سے فارغ ہوئے تو ہمیں بیٹھنے کا ارشاد کیا اور پھر فرمایا : امام اس لیے بنایا گیا ہے تاکہ اس کی اقتدا کی جائے سو جب وہ تکبیر کہے تم بھی تکبیر کہو جب رکوع کرے تم بھی رکوع کرو جب سجدہ کرے تم بھی سجدہ کرو جب سمع اللہ لمن حمدہ کہے، تم اللہم ربنا ولک الحمد، کہو اور جب امام بیٹھ کر نماز پڑھے تم سب بیٹھ کر نماز پڑھو۔

رواہ عبدالرزاق، والطبرانی والامام احمد بن حنبل و ابن ابی شیبۃ والبخاری و مسلم ابوداؤد والترمذی والنسائی و ابن ماجۃ وابن حبان۔

22911 ۔۔۔ حضرت انس بن مالک (رض) کی روایت ہے کہ حضور اکرم (صلی اللہ علیہ وآلہ وسلم) نے ارشاد فرمایا : قسم اس ذات کی جس کے قبضہ قدرت میں محمد عربی کی جان ہے اگر تم نے وہ کچھ دیکھا ہوتا جو میں نے دیکھا ہے تم ہنستے کم اور روتے زیادہ ۔ صحابہ کرام رضوان اللہ تعالیٰ عنہم اجمعین نے عرض کیا : یا رسول اللہ (صلی اللہ علیہ وآلہ وسلم) ! آپ نے کیا دیکھا ہے ؟ ارشاد فرمایا : میں نے جنت اور دوزخ دیکھی ہے ، نیز حضور اکرم (صلی اللہ علیہ وآلہ وسلم) نے صحابہ کرام رضوان اللہ تعالیٰ عنہم اجمعین کو نماز پر ابھارا اور رکوع و سجدہ میں سبقت کر جانے سے منع کیا نیز یہ کہ امام سے قبل نماز سے جانے والے مت بنو پھر صحابہ کرام رضوان اللہ تعالیٰ عنہم اجمعین سے فرمایا : میں تمہیں سامنے سے بھی دیکھتا ہوں اور پیچھے سے بھی دیکھتا ہوں ۔ (رواہ ابن النجار)

22912 ۔۔۔ سیدنا حضرت علی المرتضی (رض) ایک مرتبہ گھر سے باہر تشریف لائے دراں حالیکہ لوگ کھڑے کھڑے نماز کی انتظار کر رہے تھے آپ (صلی اللہ علیہ وآلہ وسلم) نے فرمایا : کیا وجہ ہے میں تمہیں سر اوپر اٹھائے ہوئے اور سینے باہر نکالے ہوئے کیوں دیکھ رہا ہوں ۔ (رواہ ابو عبید)

22913 ۔۔۔ سیدنا حضرت عمر ابن خطاب (رض) فرماتے ہیں کہ امام اور مقتدی کے درمیان اگر نہر ہو یا ر دیوار ہو تو اس مقتدی کی اقتداء درست نہیں ہے۔ (رواہ عبدالرزاق، و ابن ابی شیبۃ)

22914 ۔۔۔ سیدنا حضرت علی المرتضی (رض) فرماتے ہیں کہ تیمم کرنے والا پانی سے طہارت حاصل کرنے والے کی امامت نہ کرے اور بیڑیوں میں جکڑا ہوا کھلے ہوئے شخص کی بھی امامت نہ کرے ۔ (رواہ عبدالرزاق) کلام : ۔۔۔ یہ حدیث ضعیف ہے۔ دیکھے اللطیفۃ 28 ۔

22915 ۔۔۔ قتادہ (رض) حضرت انس بن مالک (رض) سے روایت کرتے ہیں کہ ایک مرتبہ میں نے سیدنا حضرت ابوبکر صدیق (رض) کے پیچھے نماز پڑھی آپ (رض) نے سورت آل عمران شروع کردی عمر (رض) اٹھے اور سیدنا حضرت ابوبکر صدیق (رض) کے پاس آئے اور کہا : اللہ تعالیٰ آپ کی مغفرت کرے قریب ہے کہ آپ کے سلام پھیرنے سے قبل سورج طلوع ہوجائے سیدنا حضرت ابوبکر صدیق (رض) نے فرمایا : اگر سورج طلوع ہو بھی گیا تو ہمیں غافل نہیں پائے گا ۔ (رواہ ابن حبان والطحاوی)

22916 ۔۔۔ عروہ کی روایت ہے کہ ایک مرتبہ سیدنا حضرت ابوبکر صدیق (رض) نے فجر کی نماز پڑھی اور اس کی دو رکعتوں میں سورت بقرہ تلاوت کی ۔ (رواہ الامام مالک وعبدالرزاق والبیہقی)

22917 ۔۔۔ ابو عبداللہ حنابحی کی روایت ہے کہ وہ ایک مرتبہ سیدنا حضرت ابوبکر صدیق (رض) مدینہ منورہ آئے اور سیدنا حضرت ابوبکر صدیق (رض) کے پیچھے مغرب کی نماز پڑھی چنانچہ آپ (رض) نے پہلی دو رکعتوں میں سورت فاتحہ اور قصار مفصل میں سے ایک ایک سورت پڑھی اور تیسری رکعت میں سورت فاتحہ کے بعد یہ آیت پڑھی ” ربنا لا تزغ قلوبنا بعد اذ ھدیتنا وھب لنا من لدنک رحمۃ انک انت الوھاب “۔ یعنی اے ہمارے رب ! ہمیں ہدایت سے سرفراز کرنے کے بعد ہمارے دلوں میں کجی نہ ڈالنا اور ہمیں اپنی رحمتوں کے خزانوں سے مالا مال کر دے بیشک تو ہی عطا کرنے والا ہے۔ (رواہ الامام مالک وعبدالرزاق وابو داؤد والبیہقی)

22918 ۔۔۔ حضرت انس بن مالک (رض) کی روایت ہے کہ ایک مرتبہ سیدنا حضرت ابوبکر صدیق (رض) نے فجر کی نماز پڑھائی اور اس میں سورت بقرہ تلاوت کی ، سیدنا حضرت عمر ابن خطاب (رض) نے فرمایا : قریب تھا کہ سورج طلوع ہوجاتا سیدنا حضرت ابوبکر صدیق (رض) نے جواب دیا :(بالفرض) اگر طلوع بھی ہوجاتا تو ہمیں غافل نہ پاتا ۔ (رواہ الشافعی وعبدالرزاق والضیاء المقدسی فی المختارہ و ابن ابی شیبۃ والبیہقی)