٧٥١٠۔۔۔ بندہ جب کوئی عمل پوشیدہ طور پر کرتا ہے تو اللہ تعالیٰ بھی اسے اپنے پاس پوشیدہ لکھتے ہیں، پھر شیطان اس کے ساتھ لگا رہتا ہے، یہاں تک کہ وہ اس کی بات کردیتا ہے، تو اسکا عمل پوشیدگی سے مٹا دیتے ہیں اور علانیہ میں لکھ دیتے ہیں پھر بھی دوسری مرتبہ بات کردے تو پوشیدہ اور اعلانیہ دونوں سے مٹا دیتے ہیں اور ریا کو لکھ دیتے ہیں (الدیلمی عن ابی الدداء (رض) )

تشریح :۔۔۔ کتنی زیادہ رعایت سے پھر بھی کوئی نہ سمجھے تو نقصان کس کا ؟

٧٥١١۔۔۔ اللہ تعالیٰ فرماتے ہیں میں بہترین شریک ہوں ، جو میرے ساتھ کسی چیز کو (کسی عمل میں) شریک کرے گا تو وہ (عمل) میرے شریک کے لیے ہے۔ (البغوی، دارقطنی، ابن عساکر، سعید بن ، منشور عن الضحاک بن قیس الفھری)

٧٥١٢۔۔۔ اللہ تعالیٰ فرماتا ہے، میں بہترین شریک ہوں جس نے میرے ساتھ کسی کو شریک کیا تو وہ میرے شریک کے لیے ہے، اے لوگو ! اللہ تعالیٰ کے لیے اعمال خالص کرو، اس واسطے کہ اللہ تعالیٰ صرف خالص عمل کو قبول کرتے ہیں، یوں نہ کہو : یہ اللہ تعالیٰ کے لیے ہے اور یہ رشتہ داری کے لیے تو وہ سارے کا سارا رشتہ داری کے لیے ہے اللہ تعالیٰ کے کچھ بھی نہیں۔ (دارقبطی فی المتفق والمفترق عنہ)

٧٥١٣۔۔۔ مجھے تمہارے بارے میں شرک اصغر یعنی ریا کا خوف ہے، جو شخص ایسا کرے گا اسے کہا جائے گا جب لوگ اپنے اعمال لے کر آئیں گے : ان لوگوں کے پاس جاؤجن کے دکھلاوے کے لیے تم عمل کرتے تھے، انہی سے (اجر) طلب کرو۔ (طبرانی عن محمود بن لبید عن رافع بن خدیج)

٧٥١٤۔۔۔ جہنم میں ایک وادی ہے جس سے جہنم خود چار سو مرتبہ پناہ مانگتی ہے، جو امت محمد (صلی اللہ علیہ وآلہ وسلم) کے ریا کاروں کے لیے بنائی گئی ہے، اللہ تعالیٰ کی کتاب کا محافظ، اور غیر اللہ کے لیے صدقہ دینے والا، بیت اللہ کا قصد کرنے والا ، اور اللہ تعالیٰ کی راہ میں نکلنے والا (ان میں شامل ہیں) ۔

٧٥١٥۔۔۔ جب الحزن سے اللہ تعالیٰ کی پناہ چاہو، لوگوں نے عرض کیا : یارسول اللہ ! جب الحزن کیا ہے ؟ آپ نے فرمایا : جہنم میں ایک وادی ہے، جس سے جہنم خود روزانہ چار سو مرتبہ پناہ مانگتی ہے، اس میں وہ لوگ داخل ہوں گے جو اپنے اعمال میں ریاکاری کرتے ہوں گے، اور اللہ تعالیٰ کو سب سے ناپسندیدہ وہ قاری ہیں جو گورنروں کی زیارت کرتے ہیں۔ (بخاری فی التاریخ، ترمذی غریب، ابن ماجہ ابوہریرہ )

٧٥١٦۔۔۔ قیامت کے روز تین آدمی سب سے پہلے جہنم میں داخل ہوں گے، ایک شخص کو لایا جائے گا ، تو وہ کہے گا ، پروردگار آپ نے مجھے کتاب کی تعلیم دی پھر میں نے اسے رات اور دن کی گھڑیوں میں پڑھا، آپ سے ثواب کی امید رکھتے ہوئے ، تو اسے کہا جائے گا : جھوٹ بولتے ہو، تو تو اس لیے نماز پڑھتا تھا کہ جائے تو قاری اور نمازی ہے سو وہ تو کہا جاچکا۔

پھر دوسرے کو لایا جائے گا، وہ کہے گا : پروردگار آپ نے مجھے مال دیا جس سے میں سے میں صلہ رحمی کی، اور مساکین پر صدقہ کیا، اور آپ کے ثواب اور جنت کی امید سے مسافرون کو سواریاں دیں ، (اس سے) کہا جائے گا : تو نے جھوٹ بولا ، تو اس واسطے صدقہ کرتا اور نماز پڑھتا تھا کہ یہ کہا جائے : وہ سخی اور فیاض ہے، کہا جائے گا : اسے جہنم کی طرف لے جاؤ ! پھر تیسرے شخص کو لایا جائے گا، وہ عرض کرے گا : اے میرے پروردگار ! میں آپ کے راستہ میں نکلا، اور آپ کی خاطر قتال کرتا رہا ہوں یہاں تک کہ بغیر پیٹھ پھیرے قتل کردیا گیا (اور یہ کام) آپ کی جنت اور ثواب کی امید سے کیے، اس سے کہا جائے تم جھوٹ بولتے ہو، تو تو اس لیے قتال کرتا رہا تاکہ یہ کہا جائے کہ تو جری اور بہادر ہے، سو یہ تو کہا جاچکا، اسے جہنم کی طرف لے چلو۔ (حاکم عن ابوہریرہ (رض))

٧٥١٧۔۔۔ کیا میں تمہیں وہ چیز نہ بتاؤں جو تمہارے لیے مسیح دجال سے زیادہ خطرناک ہے، وہ شرک خفی ہے وہ اس طرح کہ کوئی شخص کسی کے مرتبہ کی وجہ سے عمل کرے۔ (مسند احمد، والحکیم ، حاکم ، بیھقی ، سعید بن منصور عن ابوہریرہ (رض))

٧٥١٨۔۔۔ پوشیدہ شرک سے بچو، وہ اس طرح کے آدمی کسی کے دیکھنے کی وجہ سے نماز کا رکوع اور سجدہ مکمل کرے، تو یہ خفیہ شرک ہے۔ (بیھقی عن محمود ابن لبید)

٧٥١٩۔۔ اللہ تعالیٰ کی عبادت میں لوگوں کی تعریف ملانے سے بچو ورنہ تمہارے اعمال ضائع ہوجائیں (الدیلمی عن ابن عباس)

٧٥٢٠۔۔۔ لوگو ! پوشیدہ شرک سے بچو ! آدمی کسی دن کھڑے ہو نماز پڑھے اور اپنی نماز کو اس کوشش سے مزین کرے کہ لوگ اے دیکھ رہے ہیں تو یہ پوشیدہ شرک ہے۔ (بیھقی عن جابر)

٧٥٢١۔۔۔ لوگو ! شرک سے بچو ! کیونکہ وہ چیونٹی کی چال سے بھی زیادہ پوشیدہ ہے، لوگوں نے عرض کیا : یا رسول اللہ (صلی اللہ علیہ وآلہ وسلم) ! ہم اس سے کیسے بچ کرسکتے ہیں ؟ آپ نے فرمایا : یوں کہا کرو ! اے اللہ ! ہم اس بات سے آپ کی پناہ چاہتے ہیں کہ جان بوجھ کر کسی چیز کو شریک کریں، اور جن چیزوں کا علم نہیں ان کی مغفرت چاہتے ہیں۔ (مسند احمد، طبرانی عن ابی موسیٰ)

٧٥٢٢۔۔۔ اے ابوبکر ! شرک ، چیونٹی کی چال سے زیادہ پوشیدہ ہے، اور یہ شرک ہے کہ آدمی یوں کہے : جو اللہ چاہے اور جو آپ چاہیں ، اور یہ جفا ہے کہ آدمی کہے : اگ رفلاں شخص نہ ہوتا تو فلاں شخص مجھے قتل کردیتا ہے ، کیا میں تمہیں وہ بات نہ بناؤں، جس کی وجہ سے تم سے چھوٹا بڑا شرک دور ہوجائے ؟ تم ہر روز تین مرتبہ کہا کرو ! ے پروردگار میں اس بات سے آپ کہ پناہ چاہتا ہون کہ جان بوجھ کر کسی چیز کو آپ کے ساتھ شریک کروں، اور جس کے متعلق مجھے علم نہیں اس کی معافی چاہتا ہوں۔ (الحکیم عن ابن جریج بلاغا)

٧٥٢٣۔۔۔ میری امت میں شرک، کوہ صفاپرچیونٹی کی چال سے زیادہ پوشیدہ ہے، بندے اور کفر کے درمیان (علامت) نماز کا چھوڑنا ہے۔ (حلیۃ الاولیاء عن ابن عباس)

تشریح :۔۔۔ یعنی جان بوجھ کر نماز چھوڑنے سے انسان کفر کی حدود میں داخل ہوجاتا ہے بےہوش ، سویا ہوا اور معذور شخص اس سے مستثنی ہے۔

٧٥٢٤۔۔۔ اللہ تعالیٰ نے فرمایا : جس نے میرے لیے کوئی عمل کیا اور اس میں غیر کو شریک کیا تو وہ سارے کا سارا (عمل) غیر کے لیے ہے، میں شریکوں میں شرک سے زیادہ بے پروا ہوں ۔ (ابن جریر، نسائی عن ابوہریرہ )

٧٥٢٥۔۔۔ جو بندہ کسی عمل سے مزین ہوا جس کے خلاف کا اللہ تعالیٰ کو علم ہے تو اللہ تعالیٰ اسے رسول کرے گا۔ (الدیلمی عن ابی موسیٰ)

٧٥٢٦۔۔۔ جو کسی عمل سے مزین ہوا جس کے خلاف کا اللہ تعالیٰ کا علم ہے تو اللہ تعالیٰ اسے رسوا کرے گا (الدیلمی عن ابی موسیٰ)

٧٥٢٧۔۔۔ جو اپنے لباس اور قول میں لوگوں کے لیے تیار ہوا اور اپنے افعال میں اس کے برخلاف کیا تو اس پر اللہ تعالیٰ ، فرشتوں اور تمام لوگوں کی لعنت ہے۔ (حاکم فی تاریخہ عن ابی عمرو)

٧٥٢٨۔۔۔ جس نے دکھلاوے کی نماز پڑھی اس نے شرک کیا، اور جس نے دکھلاوے کا روز رکھا اس نے شرک کیا اور جس نے دکھلاوے کا صدقہ کیا تو اس نے (بھی ) شرک کیا۔ (طیالسی، مسند احمد، طبرانی، حاکم ، بیھقی عن شداد بن اوس)

٧٥٢٩۔۔۔ جو ریا کے مقام پر کھڑا ہوا تو اللہ تعالیٰ اسے (رسوئی کے لیے) ریا اور شہرت کے مقام پر کھڑا کریں گے۔ (ابن مندہ ، ابن عساکر عن بشربن عقربۃ)