٧٨٩٠۔۔۔ کیا تمہیں تمہارے سب سے برے لوگوں کا نہ بتاؤں بک بک کرنے والے جن کے منہ کھلے رہتے ہیں، کیا تمہیں تمہارے بہترین لوگ نہ بتاؤں ؟ جن کے اخلاق سب سے اچھے ہیں۔ (مسند احمد عن ابوہریرہ (رض))

٧٨٩١۔۔۔ خبرادار ! سختی کرنے والے ہلاک ہوگئے تین مرتبہ فرمایا۔ (مسلم ، ابوداؤد عن ابن مسعود)

٧٨٩٢۔۔۔ آدمی کو (بری باتوں کے لیے) زبان کی تیزی سے بڑھ کر کوئی بری چیز نہیں دی گئی۔ (الدیلمی عن ابن عباس)

٧٨٩٣۔۔۔ جسم کا ہر عضو اللہ تعالیٰ کے حضور زبان کی تیزی کی شکایت کرتا ہے۔ (ترمذی عن ابی بکر ، مربرقم، ٧٨٣٥)

٧٨٩٤۔۔۔ جو اسے (زبان کو) اور اسے (شرمگاہ کو) قابو کرلے اور آپ نے زبان اور درمیانی شے کی طرف اشارہ کیا، تو میں اسے جنت کی ضمانت دیتا ہوں۔ (الحلیۃ عن ابن مسعود)

٧٨٩٥۔۔۔ جو چیز تیرے دونوں جبڑوں اور کو چیز تیرے دونوں پاؤں کے درمیان ہے اس کی حفاظت کر۔ (ابویعلی وابن قائع وابن مندہ والعسکری فی الامثال وابن عساکر، سعید بن منصور عن عقال بن شبہ ابن عقال بن صعصعہ بن ناجیہ المجاشی عن ابیہ عن جدہ صعصعہ قال : قلت یارسول اللہ ! اوصنی قال فذکرہ)

٧٨٩٦۔۔۔ اعضاء میں سے سب سے سخت عذاب زبان کو ہوگا، زبان عرض کرے گی : اے میرے رب آپ نے مجھے وہ سزا دی جو جسم کو نہیں دی، تو اللہ تعالیٰ فرمائے گا : تجھ سے ایک ایسی بات نکلی جو مشرق ومغرب میں پہنچ گئی اور اس کی وجہ سے خون بہائے گئے مجھے اپنی عزت کی قسم ! میں تجھے ایسا عذاب دوں گا کہ کسی اور عضو کو نہیں دوں گا۔ (ابونعیم عن انس)

٧٨٩٧۔۔۔ زبان کو ایسا عذاب دیا جائے گا کہ کسی عضو کو ایسا عذاب نہیں ہوگا، وہ عرض کرے گی : اے میرے رب ! آپ نے مجھے ایسا عذاب کیوں دیا کہ کسی اور عضو کو ایسا عذاب نہیں دیا ؟ تو زبان سے کہا جائے گا : تجھ سے ایسی بات نکلی جو مشرق ومغرب تک پہنچ گئی، اور اس کی وجہ سے حرام خون بہائے گئے، اور حرام مال کیے گئے ، اور حرام کردہ عزتوں کی توہین ہوئی، مجھے اپنی عزت کی قسم ! میں تجھے ایسا عذاب دوں گا کہ ایسا عذاب کسی اور عضو کو نہیں دوں گا۔ (ابونعیم عن ابان عن انس)

٧٨٩٨۔۔۔ سلیمان بن داؤد (علیہا السلام) نے فرمایا : آج رات میں سو عورتوں کے پاس جاؤں گا، ان میں سے ہر ایک اللہ تعالیٰ کے راستہ میں جہاد کرنے والا کرے گی، تو ان کے وزیرنے ان سے کہا : ان شاء اللہ کہہ لیجئے، اور آپ نے (کسی کام میں مشغولی کی وجہ سے ) ان شاء اللہ نہیں کہا ، چنانچہ ان سے ہمبستر ہوئے تو ان میں سے صرف ایک عورت کے حمل ہوا، وہ بھی آدھا انسان ، اس ذات کی قسم ! جس کے قبضہ قدرت میں میری جان ہے ! اگر وہ ان شاء اللہ کہہ لیتے تو وہ حانث نہ ہوتے ان کی قسم پوری ہوجاتی، اور یہ ان کی حاجت برآری کا باعث بن جاتا۔ مسند احمد، بیھقی، نسائی عن ابوہریرہ مربرقم، ٥٤٦٩

٧٨٩٩۔۔۔ اللہ تعالیٰ کی قسم نہ کھایا کرو، اس واسطے کہ جو اللہ تعالیٰ کی ققسم کھائے گا اللہ تعالیٰ اسے جھوٹا کردے گا۔ (طبرانی فی الکبیر فی عن ابی امامۃ )

تشریح :۔۔۔ مثلا یہ کہے کہ اللہ تعالیٰ کی قسم تیری بخشش نہیں ہوگی۔

٧٩٠٠۔۔۔ ایک شخص نے کہا : اللہ تعالیٰ فلاں شخص کی مغفرت نہیں فرمائے گا، تو اللہ تعالیٰ نے ایک نبی کی طرف وحی بھیجی ، کہ یہ ایک غلطی ہے اس شخص کو چاہیے کہ وہ ازسرنوعمل کرے۔ (طبرانی فی الکبیر عن جندب)

٧٩٠١۔۔۔ ایک شخص نے کہا : فلاں شخص کی اللہ تعالیٰ مغفرت نہیں فرمائے گا، اللہ تعالیٰ نے فرمایا ، یہ کون ہے جو میری قسم کھاتا ہے کہ میں فلاں کو نہیں بخشوں گا ؟ میں نے فلاں کی بخشش کردی اور تیرا عمل برباد کردیا ہے۔ (مسلم عن جندب البجلی)

٧٩٠٢۔۔۔ میری امت کی قسم کھانے والوں کے لیے خرابی ہے جو کہتے ہیں : فلاں جنت میں (جائے گا) اور فلاں جہنم میں ہے۔ (بخاری فی التاریخ عن جعفر العبدی ، مرسلا)

٧٩٠٣۔۔۔ جب تم کسی شخص کے بارے میں سنو کہ وہ کہہ رہا ہے : لوگ ہلاک ہوجائیں گے تو وہ سب سے زیادہ ہلاک ہونے والا ہے۔ (مالک ، مسند احمد، بخاری الادب، مسلم ، ابوداؤد عن ابوہریرہ (رض))

٧٩٠٤۔۔۔ جب کوئی شخص کہے کہ لوگ ہلاک ہوجائیں گے تو وہ سب سے زیادہ ہلاک ہونے والا ہے۔ (مسند احمد، مسلم ، ابوداؤد عن ابوہریرہ (رض))

٧٩٠٥۔۔۔ جس نے اللہ تعالیٰ کی (کسی بات پر) قسم کھائی اللہ تعالیٰ اسے چھوٹاکردے گا۔ (ابونعیم عن ابوہریرہ (رض))

٧٩٠٦۔۔۔ جس کا (اپنے بارے میں ) یہ گمان ہے کہ جنت میں جائے گا وہ جہنمی (سوچ رکھنے والا) ہے۔ (الحارث عن عمر، ورجالہ ثقات الاانہ منفطع)

٧٩٠٧۔۔۔ کیا تمہیں نبی اسرائیل کے دو آدمیوں کی بات نہ سناؤں ؟ ان میں سے ایک اپنے آپ پر زیادتی کرتا تھا اور دوسرا ایسا تھا کہ بنی اسرائیل اسے دین علم اور اخلاق میں سب سے افضل سمجھتے تھے، اس کے سامنے اس شخص کا ذکر کیا گیا ، تو وہ کہنے لگا اللہ تعالیٰ ہرگز اس کی بخشش نہیں فرمائے گا۔

تو اللہ تعالیٰ اپنے فرشتوں سے فرمایا : کیا اسے معلوم نہیں کہ میں سب سے بڑھ کر رحم کرنے والا ہوں ؟ تو (سن لو ! ) میں اس (گنہگار) کے لیے رحمت واجب کردی اور اس (نیک) کے لیے عذاب واجب کردیا ہے، لہٰذا اللہ تعالیٰ کی (ایسی ) قسم نہ کھایا کرو۔ (الحلیۃ وابن عساکر ابی قتادۃ)

٧٩٠٨۔۔۔ ایک شخص نے کہا : کہ فلاں کی اللہ تعالیٰ مغفرت نہیں فرمائے گا، تو اللہ تعالیٰ نے ایک نبی کی طرف بھیجی کہ یہ ایک گناہ ہے اس کو چاہیے کہ ازسرنوعمل کرے۔ (طبرانی عن جندب)

٧٩٠٩۔۔۔ ایک شخص نماز پڑھ رہا تھا (اتنے میں ) ایک آدمی آیا اور اس کی گردن پر پاؤں رکھا، تو جس کی گردن نیچے تھی، کہنے لگا : اللہ تعالیٰ کی قسم ! اللہ تعالیٰ کبھی تیری بخشش نہیں فرمائے گا، تو اللہ تعالیٰ نے فرمایا : میرے بندے نے ، میرے بندے کے بارے قسم کھائی کہ میں اس کی بخشش نہیں کروں گا، تو میں نے اس کی بخشش کردی ہے۔ (طبرانی فی الکبیر عن ابن مسعود)