٥٨٧٠۔۔۔ مجھے میرے خالق سے امید کافی ہے اور میرے لیے دین میری دنیا کے لیے کافی ہے۔ (حلیۃ الاولیاء عن ابراہیم بن ادھم ، عن ابی ثابت، مرسلاً )

تشریح :۔۔۔ امور آخرت میں اللہ تعالیٰ سے امید اور دنیا کے لیے دینداری کافی ہے۔

٥٨٧١۔۔۔ یہ بھرپور بھلائی اور نیکی کا کام ہے میں اپنے رب سے امید رکھوں۔ (ابن سعد وابن عساکر عن العباس)

٥٨٧٢۔۔۔ اللہ تعالیٰ کا خوف ہر سمجھداری کی بنیاد اور پرہیزگاری تمام اعمال کی ملکہ ہے۔ (القضاعی عن انس)

تشریح :۔۔۔ خدا خوفی ہوئی تو گالی سے بچے گا غیبت سے دور رہے گا چغلخوری نہیں کرے گا، تقویٰ ہوا تو پنجوقتہ نماز کی پابندی سے اور کئی برائیاں چھوٹ جائیں گی، ایک نیکی دوسری نیکی کو کھینچتی ہے جیسے ایک برائی سے دوسری معصیت جہنم لیتی ہے۔

٥٨٧٣۔۔۔ حکمت کی بنیاد اللہ تعالیٰ کا خوف ہے۔ (الحکیم وابن لال عن ابن مسعود)

٥٨٧٤۔۔۔ اللہ تعالیٰ اس آنکھ پر رحم فرمائے جو اللہ تعالیٰ کے خوف سے روئی اور اس آنکھ پر جو اللہ تعالیٰ کے راستے میں بیدار رہی

تشریح :۔۔۔ آج کے دور میں یا تو کسی کے عشق میں آنکھ روتی ہے یا غفلت سے معصیت میں جاگتی ہے۔

٥٨٧٥۔۔۔ دو آنکھوں کو آگ کبھی نہیں چھوئے گی (ایک) وہ آنکھ جو اللہ تعالیٰ کے خوف سے روئی اور (دوسری) وہ آنکھ جو اللہ تعالیٰ کے راستے میں چوکیداری کرنے کے لیے بیدار ہوئی۔ (ابو یعلی فی مسدہ والضیاء عن انس)

٥٨٧٦۔۔۔ دو آنکھیں (جہنم کی) آگ نہیں دیکھیں گے وہ آنکھ جو اللہ تعالیٰ کے خوف سے ڈر کر روئی اور وہ آنکھ جو اللہ تعالیٰ کی راہ میں نگرانی کرتے ہوئے جاگی۔ (طبرانی فی الاوسط عن انس)

٥٨٧٧۔۔۔ دو آنکھوں کو (جہنم) کی آگ نہیں پہنچے گی، ایک وہ آنکھ جو رات کے پہر اللہ تعالیٰ کے خوف سے روئے اور ایک وہ آنکھ جو اللہ تعالیٰ کی راہ میں نگہبانی کرتے ہوئے جاگی ہو۔ (ترمذی عن ابن عباس)

٥٨٧٨۔۔۔ اللہ تعالیٰ نے فرمایا : مجھے اپنی عزت اور جلال کی قسم ! میں اپنے بندے کے لیے دو خوف اور دو امن جمع نہیں کروں گا اگر وہ دنیا میں مجھ سے بےخوف رہا تو میں اسے اس دن ڈراؤں گا جس میں، میں بندوں کو جمع کروں گا اور اگر وہ دنیا میں مجھ سے ڈرا تو میں اسے اس دن بےخوف کردوں گا جس دن بندوں کو جمع کروں گا۔ (حلیۃ الاولیاء عن شداد بن اوس)

تشریح :۔۔۔ اس واسطے کہ اللہ تعالیٰ سے نڈر ہوجانا اور اس کا خوف رکھنا دو متضاد باتیں ہیں اور دو متضاد چیزیں یکجا اور اکٹھی نہیں

ہوسکتی ہیں مثلاً دن رات، آگ پانی، اندھیرا اجالا وغیرہ۔

٥٨٧٩۔۔۔ جب اللہ تعالیٰ کے خوف کی وجہ سے کسی بندے کے رونگٹے کھڑے ہوجائیں تو اس سے گناہ ایسے جھڑتے ہیں جیسے پرانے درخت سے پتے جھڑتے ہیں۔ (نسمویہ، طبرانی فی الکبیر عن العباس)

٥٨٨٠۔۔۔ آدمی کے عالم ہونے کے لیے یہ کافی ہے کہ وہ اللہ تعالیٰ سے ڈرے ، اور اس کے جاہل ہونے کے لیے یہ کافی ہے کہ وہ اپنے آپ سے خوش ہو۔ اپنے جیسا کسی کو نہ سمجھے۔ (بیہقی فی شعب الایمان ، عن مسروق مرسلا)

تشریح :۔۔۔ بہتیرے علم ہونے کے باوجود خوف خدا نہیں رکھتے معلوم ہوا کہ محض الفاظ و نقوش کا علم معلومات ہی ہیں حقیقی علم وہ ہے جو راہ حق دکھائے، مولانا روم نے فرمایا : علمی کہ راہ حق ننماید جہالت است

٥٨٨١۔۔۔ اگر تم اللہ تعالیٰ سے اس طرح ڈرنے لگ جاؤ جیسا کہ اس سے ڈرنے کا حق ہے تو تمہیں ایسا علم ہوجائے جس کے ساتھ جہالت نہیں، اور اگر تمہیں اللہ تعالیٰ کی ایسی معرفت حاصل ہوجائے جیسا اس کی معرفت کا حق ہے تو تمہاری دعاؤں سے پہاڑ ٹل جائیں۔ (الحکیم عن معاذ)

تشریح :۔۔۔ دوسری احادیث میں آتا ہے ” من عمل بما علم ورثہ اللہ علم مالم یعلم “ جو شخص جتنا جانتا ہے اس کے مطابق عمل کرلے تو اللہ تعالیٰ اسے نامعلوم باتوں کا علم عطا کر دے گا، اسے علم دھبی یا علم لدنی کہتے ہیں انسان جتنے علم پر عمل نہیں کرتا وہ علم اس کے لیے وبال اور بوجھ ہوتا ہے دعا میں اثر یقین کے اعتبار سے ہوتا ہے جتنا محکم یقین اتنا پر اثر سوال ہوتا ہے۔

٥٨٨٢۔۔۔ جس مومن بندے کی آنکھوں سے اللہ تعالیٰ کے خوف کی وجہ سے مکھی کے سر جتنے آنسو بہہ پڑیں اور پھر اس کے چہرے کی گرمی کو پہنچ جائیں اور اسے کبھی آگ چھولے (ایسا نہیں ہوسکتا) ۔ (ابن ماجہ عن ابن مسعود)

٥٨٨٣۔۔۔ جو شخص اللہ تعالیٰ سے ڈرتا ہے اللہ تعالیٰ ہر چیز کو اس سے خوفزدہ کردیتا ہے اور جو اللہ تعالیٰ سے نہیں ڈرتا اللہ تعالیٰ اسے ہر چیز سے خوفزدہ کردیتا ہے۔ (الحکیم عن واللہ)

٥٨٨٤۔۔۔ جو شخص اللہ تعالیٰ سے ڈرتا ہے اللہ تعالیٰ اسے ہر چیز سے محفوظ رکھتا ہے۔ (ابن النجار عن ابن عباس)

٥٨٨٥۔۔۔ جو (اللہ تعالیٰ سے) ڈرا وہ رات کی تاریکی میں داخل ہوگیا، جو رات کی تاریکی میں داخل ہوا وہ (گویا) منزل تک پہنچ گیا، خبرادر ! اللہ تعالیٰ کا سودا بڑا مہنگا ہے خبردار اللہ تعالیٰ کا سودا جنت ہے۔ (نسائی حاکم عن ابوہریرہ (رض) )

تشریح :۔۔۔ یہاں خوف الٰہی کو رات کے ابتدائی حصہ میں سفر کرنے سے تشبیہ دی گئی، سابقہ زمانے میں لوگ میلوں میل لمبے سفر کرتے اور حدی خواں ساتھ ہوتے اور چلتے چلتے پتہ بھی نہ چلتا کہ منزل آجاتی تھی۔

٥٨٨٦۔۔۔ وہ شخص جہنم میں داخل نہ ہوگا جو (اللہ تعالیٰ کے خوف سے) رویا۔ (نسائی ، حاکم عن ابوہریرہ (رض))

٥٨٨٧۔۔۔ وہ شخص جہنم میں داخل نہیں ہوگا جو اللہ تعالیٰ کے خوف سے روتا ہے یہاں تک کہ دودھ واپس تھنوں میں لوٹ جائے اللہ تعالیٰ کے راستے کا گرد و غبار اور جہنم کا دھواں کبھی بھی کسی مسلمان کے نتھنوں میں جمع نہیں ہوسکتے۔ (مسند احمد، ترمذی، نسائی، حاکم عن ابوہریرہ (رض))

٥٨٨٨۔۔۔ تم لوگ غم اختیار کیا کرو اس واسطے کہ یہ دل کی چابی ہے، اور اپنے آپ کو بھوکا پیاسا رکھا کرو۔ (طبرانی فی الکبیر عن ابن عباس)

تشریح :۔۔۔ کبھی کبھار غم کی حالت اور کبھی کبھار بھوک پیاس کی عادت، اسی بنا پر پورے سال میں صرف ایک ماہ کے روزے فرض ٹھہرے نہ کہ پورے سال کے، لوگوں کے سامنے غمزدہ اور افسردہ چہرہ لے کر پھرنا اچھی بات نہیں، مولانا ابو الکلام آزاد نے غبار خاطر میں فرمایا : کہ زندگی گزارنے کا سب سے بہترین طریقہ یہ ہے کہ آپ لوگوں کو خوش رکھیں انھیں خوش دیکھ کر آپ خود بخور خوش ہوجائیں گے لہٰذا میانہ روی اختیار کریں اور غلو و انتہا پسندی اور یکطرفہ پہلو سے بچیں۔

٥٨٨٩۔۔۔ لوگوں سے سب سے اولین جو چیز اٹھالی جائے گی وہ خشوع ہوگی۔ (طبرانی فی الکبیر عن شداد بن اوس)