46877 فتح مکہ کے بعد ہجرت نہیں ہے، لیکن ایمان، نیت اور جہاد پھر بھی باقی ہیں اور عورتوں کے ساتھ نکاح متعہ حرام ہے۔۔ رواہ الحسن بن سفیان والبغوی والباوردی وابن السکن وابن مندہ وابن قانع والطبرانی و ابونعیم عن الحارث ابن غزیۃ الانصاری

46278 فتح کے بعد ہجرت نہیں ہے۔ رواہ عبدالرزاق عن انس

46279 حضرت ابوبکر (رض) فرماتے ہیں : میں نے نبی کریم (صلی اللہ علیہ وآلہ وسلم) سے عرض کیا دراں حالیکہ آپ (صلی اللہ علیہ وآلہ وسلم) غار (ثور) میں تھے : یارسول اللہ ! ان کفار میں سے اگر کسی کی نظر اپنے قدموں پر پڑجائے تو یقیناً ہمیں دیکھ پائے گا۔ آپ (صلی اللہ علیہ وآلہ وسلم) نے فرمایا : اے ابوبکر ! ان دو کے بارے میں تیرا کیا گمان ہے جن کا تیسرا اللہ ہے۔ رواہ ابن سعد وابن شیبۃ واحمد بن حنبل والبخاری ومسلم عن الترمذی وابن جریر فی تھذیب الآثار وابن المنذر وابوعوانۃ وابن حبان وابن مردویہ و ابونعیم فی العرفۃ

46280 حضرت ابوبکر (رض) کی روایت ہے کہ مشرکین میں سے ایک آدمی آیا حتیٰ کہ رسول کریم (صلی اللہ علیہ وآلہ وسلم) کی طرف منہ کرکے پیشاب کرنے لگا میں نے عرض کیا : یارسول اللہ ! کیا یہ آدمی ہمیں نہیں دیکھ پاتا ؟ آپ نے ارشاد فرمایا : اگر یہ شخص ہمیں دیکھ سکتا تو وہ ہماری طرف منہ کرکے پیشاب نہ کرتا یعنی یہ دونوں حضرت اس وقت غار ثور میں تھے۔ رواہ ابویعلی وضعف

46281 حضرت ابوبکر (رض) کی روایت ہے کہ میں نے ایک آدمی کو غار کی طرف آئے ہوئے دیکھا میں نے عرض کیا : یارسول اللہ ! اگر اس شخص نے اپنے قدموں پر نظر ڈال دی یقیناً ہمیں دیکھ لے گا۔ آپ (رض) نے فرمایا : ہرگز نہیں چونکہ فرشتوں نے اس کے آگے پردہ کر رکھا ہے تھوڑی دیر گزری تھی کہ وہ شخص ہماری طرف منہ کرکے پیشاب کرنے بیٹھ گیا۔ رسول کریم (صلی اللہ علیہ وآلہ وسلم) نے ارشاد فرمایا۔ اے ابوبکر ! اگر یہ ہمیں دیکھ سکتا ایسا ہرگز نہ کرتا۔ رواہ ابونعیم فی الدلائل من طریق آخر

46282 حضرت ابوبکر (رض) کی روایت ہے کہ جب وہ دونوں حضرات غار ثور میں پہنچے تو حضرت ابوبکر (رض) نے غار میں ایک سوراخ دیکھا جس پر اپنے پاؤں رکھ دیئے اور عرض کیا : اگر کوئی بچھو یا سانپ ہو تو اس کے ڈسے کا گزند مجھی کو پہنچے۔ رواہ ابن ابی شیبۃ وابن المنذر وابوالشیخ و ابونعیم فی الدلائل

46283 حضرت عائشہ (رض) کی روایت ہے کہ حضرت ابوبکر (رض) نے فرمایا : جب ہم غار ثور میں داخل ہونے کے لیے اوپر چڑھ رہے تھے میں نے دیکھا کہ رسول کریم (صلی اللہ علیہ وآلہ وسلم) کے قدموں سے خون رس رہا تھا جب کہ میرے پاؤں چلنے کے عادی ہونے کی وجہ سے چٹان کی مانند تھے حضرت عائشہ (رض) فرماتی ہیں : رسول کریم (صلی اللہ علیہ وآلہ وسلم) ننگے پاؤں چلنے کے عادی نہیں تھے۔ رواہ ابن مردویہ

46284 عمرو بن حارث اپنے والد سے روایت نقل کرتے ہیں کہ ایک مرتبہ حضرت ابوبکر (رض) نے فرمایا : تم میں سے کون سورت توبہ کی قرات کرے گا ؟ ایک شخص بولا : میں قرات کرتا ہوں فرمایا : پڑھو۔ چنانچہ جب وہ شخص اس آیت پر پہنچا۔ اذیقول لصاحبہ لا تحزن “ جب انھوں نے اپنے ساتھی سے کہا : غم نہ کرو حضرت ابوبکر صدیق (رض) روپڑے اور فرمایا : اللہ کی قسم ! ان کا ساتھی میں ہی ہوں۔ رواہ ابن ابی حاتم

46285 حبشی بن جنادہ کی روایت ہے کہ حضرت ابوبکر (رض) نے عرض کیا یارسول اللہ ! اگر کوئی مشرک اپنا سر اوپر اٹھالیتا ہے تو ہمیں ضرور دیکھ لے گا۔ آپ (صلی اللہ علیہ وآلہ وسلم) نے فرمایا : اے ابوبکر ! غم نہ کیجئے چونکہ اللہ تعالیٰ ہمارے ساتھ ہے۔ رواہ ابن شاھین وفیہ حصن بن مخارق واہ

46286 حضرت براء بن عازب (رض) کی روایت ہے کہ حضرت ابوبکر (رض) نے میرے والد عازب سے تیرہ (13) درہم کے بدلہ میں ایک زین خریدی ابوبکر (رض) نے والد صاحب سے فرمایا : براء سے کہو وہ اسے اٹھا کر میرے گھر تک پہنچا دے۔ والد نے کہا : نہیں۔ حتیٰ کہ آپ مجھے بتادیں کہ جب آپ رسول کریم (صلی اللہ علیہ وآلہ وسلم) کے ساتھ سفر پر نکلے تھے اس وقت آپ کے ساتھ کیا بیتی تھی۔ حضرت ابوبکر (رض) نے فرمایا : ہم (اپنے گھروں سے) نکل پڑے ہم پورا دن اور پوری رات چلتے رہے حتیٰ کہ دوپہر کا وقت ہوگیا میں نے ادھر، ادھر دیکھا تکہ مجھے کوئی سایہ نظر آئے جس کے نیچے ہم پناہ لے سکیں چنانچہ یکایک ہم ایک چٹان کے پاس پہنچ گئے میں اس کی طرف آگے بڑھا۔ دیکھا کہ اس کا کچھ سایہ نکل چکا ہے میں نے رسول کریم (صلی اللہ علیہ وآلہ وسلم) کے لیے جگہ درست کی اور آپ کے لیے ایک کپڑا بچھا دیا۔ میں نے عرض کیا : یارسول اللہ ! آپ لیٹ جائیں چنانچہ آپ (صلی اللہ علیہ وآلہ وسلم) لیٹ گئے پھر میں وہاں سے تھوڑا آگے چل دیا تاکہ میں دیکھوں کہ ہماری تلاش میں تو کوئی نہیں آرہا ۔ اچانک بکریں کے ایک چرواہے پر میری نظر پڑی میں نے اس سے پوچھا : اے چرواہے ! تو کس کا غلام ہے ؟ چرواہے نے قریش کے ایک آدمی کا نام لیا کہ میں اس کا غلام ہوں میں اسے جانتا تھا ۔ میں نے کہا : کیا تیری بکریوں میں دودھ ہے ؟ اس نے جواب دیا : جی ہاں۔ میں نے کہا : کیا تم مجھے دودھ دوھ کر دے سکتے ہو ؟ اس نے کہا : جی ہاں میں نے اسے دودھ دوھنے کا حکم دیا اس نے ایک بکری پکڑی، پھر میں نے اس سے کہا کہ بکری کے تھنوں سے غبار اچھی طرح جھاڑلو اس نے تھنوں سے غبار جھاڑ دیا پھر میں نے ہاتھوں سے غبار جھاڑنے کو کہا : اس نے ہاتھوں سے غبار جھاڑ دیا میرے پاس ایک برتن تھا جس کے منہ پر ایک کپڑا بندھا ہوا تھا چنانچہ اس نے میرے لیے کچھ دودھ دوہا، پھر میں نے برتن میں تھوڑا سا پانی ڈالا حتیٰ کہ برتن کا نچلا حصہ ٹھنڈا ہوگیا۔ پھر میں رسول اللہ (صلی اللہ علیہ وآلہ وسلم) کے پاس واپس لوٹ آیا۔ آپ (صلی اللہ علیہ وآلہ وسلم) بیدار ہوچکے تھے۔ میں نے عرض کیا : یارسول اللہ ! دودھ پی لیں آپ نے دودھ نوش فرمایا حتیٰ کہ میں راضی ہوگیا۔ پھر میں نے عرض کیا : ہمیں یہاں سے کوچ کرنے کا وقت ہوچکا ہے۔ ہم وہاں سے کوچ کر گئے جب کہ لوگ ہماری تلاش میں تھے۔ ہمیں بجز سراقہ بن مالک بن جعشم کے کوئی نہیں پاسکا : میں نے عرض کیا : یارسول اللہ ! یہ شخص ہماری تلاش میں نکلا ہے جو ہمارے قریب پہنچ چکا ہے۔ آپ نے فرمایا : غم مت کرو چونکہ اللہ تعالیٰ ہمارے ساتھ ہے۔ حتیٰ کہ جب سراقہ ہمارے قریب ہوگیا حتیٰ کہ ہمارے اور اس کے درمیان ایک نیزے یا نیزوں یا تین نیزوں کا فرق رہ گیا تھا میں نے عرض کیا : یارسول اللہ ! یہ شخص ہماری تلاش میں ہمارے پاس پہنچ چکا ہے۔ میں رونے لگا، آپ (صلی اللہ علیہ وآلہ وسلم) نے فرمایا : تم کیوں روتے ہو ؟ میں نے عرض کیا بخدا ! میں اپنے لیے نہیں روہا ہوں میں تو آپ کے رو رہا ہوں۔ رسول کریم (صلی اللہ علیہ وآلہ وسلم) نے اسے بددعا دی اور فرمایا : یا اللہ ! ہماری طرف سے تو جیسے چاہے اس سے نمٹ لے۔ چنانچہ اسی وقت سراقہ کا گھوڑا گھٹنوں تک پتھریلی زمین میں دھنس گیا۔ سراقہ نے فوراً گھوڑے سے نیچے چھلانگ لگادی اور بولا : اے محمد ! میں جانتا ہوں کہ یہ آپ کے بددعا کا اثر ہے لہٰذا اللہ تعالیٰ سے اب دعا کرو کہ مجھے اس مصیبت سے نجات عطا فرمائے اللہ کی قسم میں اپنے پیچھے کے جمع لوگوں کو آپ کی بابت عدم دستیابی کا یقین دلادوں گا یہ رہا میرا ترکش اس سے ایک تیر نکال میں اور یقیناً آپ کا گزر فلاں جگہ سے میری بکریوں کے پاس سے ہوگا ان بکریوں سے اپنی ضرورت پوری کرلینا رسول کریم (صلی اللہ علیہ وآلہ وسلم) نے فرمایا : مجھے تیری بکریوں کی کوئی ضرورت نہیں پھر رسول کریم (صلی اللہ علیہ وآلہ وسلم) نے اس کے لیے دعا کی اور وہ عذاب سے آزاد ہوگیا اور اپنے ساتھیوں کی طرف واپس چلا گیا۔ رسول کریم (صلی اللہ علیہ وآلہ وسلم) آگے چل پڑے میں آپ کے ہمراہ رہا حتیٰ کہ ہم رات کو مدینہ پہنچے آپ (صلی اللہ علیہ وآلہ وسلم) سے لوگ ملنے لگے لوگ راستوں اور گلیوں میں نکل آئے الغرض خدام اور بچوں تک سب ہی ہجوم کر آئے اور اللہ اکبر کے نعرے بلند ہونے لگے کہ رسول اللہ (صلی اللہ علیہ وآلہ وسلم) تشریف لاچکے ہیں محمد (صلی اللہ علیہ وآلہ وسلم) آگئے ہیں لوگ آپس میں جھگڑنے لگے کہ رسول کریم (صلی اللہ علیہ وآلہ وسلم) کس کے یہاں تشریف لے جائیں اس پر رسول کریم (صلی اللہ علیہ وآلہ وسلم) نے فرمایا : میں آج رات بنو نجار جو کہ عبدالمطلب کے ماموں ہیں کے پاس ٹھہروں گا تاکہ میں ان کا احترام کرسکوں۔ صبح کو جہاں آپ کا حکم ملا وہاں پہنچ گئے۔ رواہ ابن ابی شیبۃ واحمد بن حنبل والبخاری ومسلم وابن خزیمۃ والبیہقی فی شعب الایمان والبیہقی فی الدلائل

46287 حضرت ابوبکر (رض) فرماتے ہیں : میں (ہجرت کے موقع پر) رسول کریم (صلی اللہ علیہ وآلہ وسلم) کے ہمراہ چل پڑا ہم عرب کی بستیوں میں سے ایک بستی کے قریب پہنچے رسول کریم (صلی اللہ علیہ وآلہ وسلم) نے بستی کی ایک طرف ایک گھر دیکھا آپ اس کی طرف چل دیئے جب ہم اس گھر میں گئے وہاں صرف ایک عورت تھی وہ بولی : اے اللہ کے بندے ! میں عورت ہوں میرے ساتھ کوئی نہیں ہے جب تم کسی بستی میں جاؤ تو تمہیں بستی کے کسی بڑے آدمی کے پاس جانا چاہیے۔ آپ (صلی اللہ علیہ وآلہ وسلم) نے اس کی بات کا جواب نہ دیا۔ یہ شام کا وقت تھا اتنے میں اس عورت کا ایک بیٹا بکریاں ہانکتے ہوئے آگیا۔ عورت نے اپنے بیٹے سے کہا : اے بیٹا ! یہ بکری اور چھری ان دو آدمیوں کے پاس لے جاؤ اور ان سے کہو کہ میری امی کہہ رہی ہے کہ اس بکری کو ذبح کرو، خود بھی کھاؤ اور ہمیں بھی کھلاؤ۔ چنانچہ جب وہ نبی کریم (صلی اللہ علیہ وآلہ وسلم) کے پاس آیا تو آپ نے فرمایا : چھری واپس لے جاؤ اور میرے پاس کوئی برتن لاؤ لڑکا بولا : یہ بکری بانجھ ہوچکی ہے اور اس میں دودھ نہیں ہے۔ آپ نے فرمایا جاؤ میرے پاس برتن تو لاؤ چنانچہ لڑکا گیا اور اپنے ساتھ برتن لیتا آیا۔ نبی کریم (صلی اللہ علیہ وآلہ وسلم) نے برتن جھاڑے پھر دودھ دوہا حتیٰ کہ برتن بھر گیا پھر فرمایا کہ یہ دودھ اپنی ماں کے پاس لے جاؤ۔ چنانچہ اس عورت نے سیر ہو کر دودھ پیا، لڑکا برتن لے کر واپس آگیا آپ نے فرمایا : یہ بکری لے جاؤ اور دوسری لے آؤ آپ نے اس بکری کو بھی پہلی کی طرح دوہا پھر مجھے دودھ پلایا۔ پھر لڑکا ایک اور بکری لیتا آیا آپ نے اسے بھی پہلی کی طرح دوہا اور پھر خود نبی کریم (صلی اللہ علیہ وآلہ وسلم) نے دودھ پیا ہم نے یہیں پر یہ رات گزاری پھر ہم (صبح ہوتے ہی) چل پڑے چنانچہ یہ عورت آپ کو بابرکت (مبارک) شخصیت کے نام سے پکارتی تھی اس عورت کی بکریاں بہت زیادہ بڑھ گئیں حتیٰ کہ مدینہ تک اس کی بکریوں کا شور وغل رہتا تھا (اس کے بعد) ایک مرتبہ حضرت ابوبکر صدیق (رض) کا یہیں سے گزر ہوا اس عورت کے بیٹے نے آپ (رض) کو دیکھا تو آپ کو پہچان لیا اور اپنی ماں سے کہنے لگا : اے امی ! یہ وہی شخص ہے جس کے ساتھ وہ بابرکت شخصیت ہمارے یہاں ٹھہری تھی چنانچہ لڑکے کی ماں کھڑی ہوئی اور کہنے لگی اے اللہ کے بندے ! تمہارے ساتھ وہ کوئی شخصیت تھی ؟ جواب دیا : کیا تم انھیں نہیں جانتی ہو ؟ عرض کیا : نہیں۔ فرمایا : وہ نبی آخرالزماں (صلی اللہ علیہ وآلہ وسلم) ہیں۔ عورت نے عرض کیا : مجھے ان کے پاس لے چلو۔ چنانچہ ابوبکر (رض) عورت کو آپ (صلی اللہ علیہ وآلہ وسلم) کے پاس لائے آپ (صلی اللہ علیہ وآلہ وسلم) نے اس عورت کو کھانا کھلایا اور عطیہ عنایت فرمایا جب کہ عورت نے آپ (صلی اللہ علیہ وآلہ وسلم) کو کچھ پنیر اور دیہات کا کچھ سامان دیا آپ (صلی اللہ علیہ وآلہ وسلم) نے عورت کو تحفہ میں کپڑے پہنائے اور عطیہ دیا ۔ چنانچہ وہ عورت متاثر ہو کر اسلام لے آئی۔۔ رواہ البیہقی فی الدلائل وابن عساکر قال ابن کثیر مسندہ حسن۔ فائدہ : یہ حدیث مختلف طرق سے مروی ہے اس عورت کا نام ام معبد (رض) ہے جو اسلام لے آئی تھی

46288 حضرت عمر (رض) فرماتے ہیں : رسول کریم (صلی اللہ علیہ وآلہ وسلم) کی وفات کے بعد ہجرت نہیں ہے۔ رواہ النسائی وابویعلی وابن مندہ فی غرابت شعبہ و سعید بن المنصور

46289 حضرت عمر (رض) فرماتے ہیں : ہم مدینہ میں سخت انتظار میں دیتے تھے کہ رسول اللہ (صلی اللہ علیہ وآلہ وسلم) ہمارے پاس کب تشریف لائیں گے ۔ انصار صبح کو ایک ٹیلے پر چڑھ جاتے اور اس پر بیٹھ جاتے حتیٰ کہ سورج بلند ہوجاتا جب سورج بلند ہو کر تپش دینے لگتا لوگ اپنے گھروں کو واپس لوٹ آتے اسی دوران ہم رسول کریم (صلی اللہ علیہ وآلہ وسلم) کی اتنظار میں تھے اچانک ایک یہودی جو ٹیلے پر کھڑا تھا پکارنے لگا : اے جماعت عرب ! یہ ہیں تمہارے صاحب جن کا انتظار میں تم لگے ہوئے ہو۔ رواہ البزار وحسنہ الحافظ ابن حجر فی فوائد

46290 ابن عمر (رض) کی روایت ہے کہ حضرت عمر (رض) نے فرمایا : روحاء کے ماوراء اپنا مال مت رکھو اور نہ ہی ہجرت کے بعد واپس لوٹو مکہ کے چھوڑے ہوئے لوگوں کی بیویوں سے نکاح مت کرو بلکہ اپنی عورتوں سے ان کے گھروں میں نکاح کرو۔ رواہ المحاملی فی امالیہ

46291 حضرت عثمان (رض) فرماتے ہیں کہ سر زمین ہجرت میں سات سو گنا زیادہ نفقہ میں اضافہ ہوجاتا ہے۔ رواہ ابن عساکر

46292 حضرت علی (رض) فرماتے ہیں : نبی کریم (صلی اللہ علیہ وآلہ وسلم) نے جبرائیل امین سے دریافت کیا : ہجرت میں میرے ساتھ کون ہونا چاہیے ؟ جبرائیل نے کہا : ابوبکر صدیق (رض) ۔ رواہ الحاکم

46293 حضرت علی (رض) کی روایت ہے کہ نبی کریم (صلی اللہ علیہ وآلہ وسلم) ہجرت کے لیے نکلے آپ کے ساتھ ابوبکر (رض) بھی نکلے آپ (صلی اللہ علیہ وآلہ وسلم) ابوبکر (رض) کے سوا کسی پر اعتماد نہیں کرتے تھے حتیٰ کہ غار میں داخل ہوئے۔ رواہ ابوبکر فی الغیلانیات

46394” مسند براء بن عازب “ رسول کریم (صلی اللہ علیہ وآلہ وسلم) کے صحابہ کرام (رض) میں سے سب سے پہلے یہ حضرات ہمارے پاس تشریف لائے ہیں حضرت مصعب بن عمیر (رض) ، ابن ام مکتوم یہ دونوں حضرات ہمیں قرآن پڑھاتے تھے پھر حضرت عمار (رض) ، بلال (رض) سعید (رض) آئے پھر حضرت عمر بن خطاب (رض) بیس آدمیوں کے ہمراہ تشریف لائے ۔ پھر رسول کریم (صلی اللہ علیہ وآلہ وسلم) تشریف لائے میں نے اہل مدینہ کو اتنا زیادہ خوش ہوتے نہیں دیکھا جتنا کہ آپ (صلی اللہ علیہ وآلہ وسلم) کی آمد پر خوش ہوئے تھے آپ اس وقت تشریف لائے جب میں نے سورت ” سبح اسم ربک الاعلیٰ “ پڑھ لی جو کہ اوساط مفصل میں سے ہے۔ رواہ ابن ابی شیبۃ

46295” مسند بشیر بن فدیک “ ابونعیم کہتے ہیں ان کی ایک ہی روایت ہے اوزاعی، زہری ، صالح بن بشیر بن فدیک سے مروی ہے کہ ان کے دادا نبی کریم (صلی اللہ علیہ وآلہ وسلم) کی خدمت میں حاضر ہوئے اور عرض کیا : یارسول اللہ ! لوگوں کا خیال ہے کہ جس نے ہجرت نہ کی وہ ملاک ہوگیا۔ نبی کریم (صلی اللہ علیہ وآلہ وسلم) نے فرمایا : اے فدیک ! نماز قائم کرو، زکوۃ ، دو برائیاں چھوڑ دو اپنی قوم کی سرزمین میں جہاں چاہو رہو تم مہاجر ہوجائے گے۔ رواہ البغوی وابن مندہ و ابونعیم وقال ذکرہ عبداللہ بن عبدالجار الخبائری عن الحارث بن عبیدۃ عن محمد بن ولید الزبیدہ عن الزھری فقال عن صالح بن بشیر عن ابیہ قال جاء فدیک

46296 جریربجلی کی روایت ہے کہ رسول کریم (صلی اللہ علیہ وآلہ وسلم) نے قبیلہ خثعم کی طرف سریہ (لشکر) روانہ کیا لیکن لوگوں نے سجدہ کرکے اپنے آپ کو بچا لیا۔ (یعنی یہ ظاہر کیا کہ ہم مسلمان ہیں) لیکن صحابہ کرام (رض) نے ان کا عذر خاطر میں نہ لاتے ہوئی ان کا قتل عام شروع کردیا نبی کریم (صلی اللہ علیہ وآلہ وسلم) کو سا کی خبر کی گئی نبی کریم (صلی اللہ علیہ وآلہ وسلم) نے لشکر کو مقتولین کی نصف دیت ادا کرنے کا حکم دیا اور فرمایا کہ میں ہر اس مسلمان سے بری الذمہ ہوں جو مشرکین کے درمیان مقیم ہو صحابہ کرام (رض) نے عرض کیا : یارسول اللہ ! وہ کیوں ؟ فرمایا : کیا تم ان کی جلتی ہوئی آگ نہیں دیکھ سکتے تھے۔۔ رواہ العسکری فی الامثال والبیہقی وفی شعب الایمان